నారాయణఖేడ్ నియోజకవర్గంలోని నారాయణఖేడ్ మున్సిపల్ పట్టణంలోని ప్రాంతీయ ఆసుపత్రిలో గర్భాశయ క్యాన్సర్ నివారణకు సంబంధించిన టీకాల కార్యక్రమాన్ని నారాయణఖేడ్ శాసనసభ్యులు డాక్టర్ పి సంజీవరెడ్డి మరియు నారాయణఖేడ్ ఉప కలెక్టర్ ఉమ హారతి ప్రారంభించారు. మహిళల ఆరోగ్య రక్షణను దృష్టిలో పెట్టుకొని ఈ కార్యక్రమాన్ని చేపట్టారు.ఈ టీకా గర్భాశయ క్యాన్సర్‌ను ఎక్కువ శాతం వరకు నివారించడంలో సహాయపడుతుంది. ముఖ్యంగా బాలికలు మరియు యువతులు ఆరోగ్యంగా ఉండేందుకు ఇది ఎంతో ఉపయోగకరమని తెలిపారు. ఈ సందర్భంగా డాక్టర్ పట్లోళ్ల సంజీవరెడ్డి స్వయంగా బాలికలకు టీకా ఇచ్చి కార్యక్రమాన్ని ప్రారంభించారు.ఈ సందర్భంగా మాట్లాడుతూ, గర్భాశయ క్యాన్సర్ వంటి ప్రమాదకర వ్యాధులను ముందుగానే నివారించడానికి ఈ టీకా ఎంతో ఉపయోగపడుతుందని చెప్పారు. 14 సంవత్సరాలు పూర్తైన బాలికలు మరియు యువతులు తప్పకుండా ఈ టీకాను తీసుకోవాలని సూచించారు. మహిళల ఆరోగ్యాన్ని కాపాడేందుకు ప్రభుత్వం ప్రత్యేకంగా దృష్టి పెట్టి రాష్ట్రవ్యాప్తంగా ఉచితంగా ఈ టీకా కార్యక్రమాన్ని అమలు చేస్తోందని వివరించారు.ఈ కార్యక్రమంలో స్థానిక వైద్యాధికారులు, ఆసుపత్రి సిబ్బంది, మున్సిపల్ కౌన్సిలర్లు, ప్రజాప్రతినిధులు, నాయకులు మరియు స్థానిక ప్రజలు పాల్గొన్నారు.