మునగాల మండల కేంద్రంలోని పోలీస్ స్టేషన్ సమీపంలో ఉన్న కట్టు కాలువ వద్ద తరచూ ప్రమాదాలు జరిగే అవకాశం ఉండటంతో తక్షణమే రక్షణ చర్యలు చేపట్టాలని సామాజిక కార్యకర్తలు సంగేపు నరసింహారావు, చేకూరి ముత్తయ్య అధికారులను కోరారు.ఈ మేరకు సోమవారం నిర్వహించిన ప్రజావాణిలో సంబంధిత అధికారులకు వినతిపత్రం సమర్పించారు.కాలువ పక్కనే వాహనాల రాకపోకలు అధికంగా ఉండే సీసీ రోడ్డు ఉండటంతో వాహనదారులు అదుపుతప్పి కాలువలో పడే ప్రమాదం ఉందని వారు ఆందోళన వ్యక్తం చేశారు. ఇప్పటికే ఈ ప్రాంతం ప్రమాదాలకు ఆస్కారంగా మారుతోందని పేర్కొన్నారు. ప్రజల భద్రతను దృష్టిలో ఉంచుకుని కాలువలో పేరుకుపోయిన చెత్తాచెదారాన్ని తొలగించడంతో పాటు, కాలువకు ఇరువైపులా రక్షణ గోడ లేదా ఫెన్సింగ్ ఏర్పాటు చేయాలని అధికారులను విజ్ఞప్తి చేశారు. ప్రమాదాలు చోటుచేసుకోకముందే అధికారులు స్పందించి తక్షణ చర్యలు తీసుకోవాలని కోరారు.