యాదాద్రి భువనగిరి జిల్లా రామన్నపేట మండలం నిదానపల్లి గ్రామంలో కాటమయ్య స్వామి ఆలయ నిర్మాణానికి బుధవారం భూమిపూజ నిర్వహించారు. గౌడ సంఘం చైర్మన్ డాక్టర్ కొండ మల్లేశం గౌడ్, ముస్తాది దారుడు వీరమల్ల భిక్షం గౌడ్ ఆధ్వర్యంలో జరిగిన ఈ కార్యక్రమం భక్తిశ్రద్ధల నడుమ అంగరంగ వైభవంగా సాగింది.

సిద్ధాంతి బేతాజీ సత్యనారాయణ శాస్త్రి, దీక్షితులు శశిధర్ ఆధ్వర్యంలో వేదమంత్రోచ్ఛారణల మధ్య శాస్త్రోక్తంగా పూజా కార్యక్రమాలు నిర్వహించి ఆలయ నిర్మాణానికి శంకుస్థాపన చేశారు. ఈ కార్యక్రమానికి గ్రామానికి చెందిన గౌడ కులస్తులు, కుల పెద్దలు, యువకులు పెద్ద సంఖ్యలో హాజరై భక్తితో పూజల్లో పాల్గొన్నారు.కాటమయ్య స్వామి ఆలయ నిర్మాణానికి శ్రీకారం చుట్టడంతో గ్రామంలో ఆధ్యాత్మిక వాతావరణం నెలకొంది. ఆలయ నిర్మాణం చేపట్టడంపై గ్రామస్తులు హర్షం వ్యక్తం చేశారు.