ఇంద్రపాలనగరం:

ఇంద్రపాలనగరంలో కోరమండల్ ఇంటర్నేషనల్ కంపెనీ సహకారంతో సర్పంచ్ గర్ధాస్ విక్రమ్ ఆధ్వర్యంలో సంక్రాంతి సంబరాలు ఘనంగా నిర్వహించారు. ఈ సందర్భంగా మహిళలకు ఉచితంగా ముగ్గు పొడి, రంగులు పంపిణీ చేసి ముగ్గుల పోటీలను ప్రారంభించారు.

పోటీల్లో పాల్గొన్న మహిళలు రంగురంగుల ముగ్గులతో తమ కళానైపుణ్యాన్ని ప్రదర్శించారు. ఉత్తమ ముగ్గులు వేసిన వారికి ప్రథమ, ద్వితీయ, తృతీయ బహుమతులు అందజేయగా, పోటీలో పాల్గొన్న ప్రతి ఒక్కరికీ ప్రోత్సాహక బహుమతులు అందించారు.

సంక్రాంతి సందర్భంగా గంగిరెద్దుల విన్యాసాలు, హరిదాస్ ప్రదర్శనలు, బోగిమంటల ఏర్పాటు చేసి గ్రామమంతా పండుగ వాతావరణంతో కళకళలాడింది. సంప్రదాయ పండుగలను పరిరక్షిస్తూ ఇలాంటి కార్యక్రమాలు నిర్వహించడం సంతోషకరమని గ్రామస్తులు తెలిపారు.

ఈ కార్యక్రమంలో ఉపసర్పంచ్ నల్లస్వామి జయసుధ, వార్డు సభ్యులు, సీనియర్ నాయకులు, రైతులు, యువకులు, మహిళా సంఘాల అధ్యక్షురాలు, మహిళలు పెద్ద సంఖ్యలో పాల్గొని సంక్రాంతి సంబరాలను విజయవంతం చేశారు.