సంగారెడ్డి నియోజకవర్గంలోని ఆరుట్ల, ఫసల్‌వాది, కంది ప్రాంతాల్లో హెచ్‌ఎండీఏ భూసమీకరణ లే అవుట్లపై సంగారెడ్డి జిల్లా కలెక్టర్‌ ప్రతీక్‌ జైన్‌ ఆధ్వర్యంలో సమీక్ష సమావేశం నిర్వహించారు. ఈ సమావేశంలో టీపీసీసీ వర్కింగ్‌ ప్రెసిడెంట్‌ జగ్గారెడ్డి, నిర్మల జగ్గారెడ్డితో పాటు హెచ్‌ఎండీఏ, రెవెన్యూ శాఖల అధికారులు పాల్గొన్నారు. ఆయా ప్రాంతాల్లో భూములు ఇచ్చిన రైతులకు ధ్రువపత్రాలు అందించినప్పటికీ, ప్లాట్ల కేటాయింపులో జాప్యం జరుగుతుండటంపై జగ్గారెడ్డి అధికారులను వివరాలు అడిగి తెలుసుకున్నారు. ఆరుట్లలో లే అవుట్‌ పనులు పూర్తయినప్పటికీ లబ్ధిదారుల జాబితా రావాల్సి ఉందని, ఫసల్‌వాదిలో భూసేకరణ ప్రక్రియ సుమారు 60 శాతం పూర్తయిందని, కందిలో 50 ఎకరాలకు ప్రతిపాదించిన లే అవుట్‌కు ప్రస్తుతం 46 ఎకరాలు అందుబాటులో ఉన్నాయని అధికారులు తెలిపారు. భూములు కోల్పోయిన రైతులు ఎన్నో సంవత్సరాలుగా ఎదురుచూస్తున్నందున మిగిలిన పనులను త్వరగా పూర్తి చేసి ప్లాట్లు కేటాయించాలని జగ్గారెడ్డి సూచించారు. నవంబర్‌ చివరికల్లా ఆరుట్ల, ఫసల్‌వాది, కంది లే అవుట్లలో అర్హులైన రైతులకు ప్లాట్లు కేటాయించేలా పనులను వేగవంతం చేయాలని కలెక్టర్‌ ప్రతీక్‌ జైన్‌ అధికారులను ఆదేశించారు. హెచ్‌ఎండీఏ, రెవెన్యూ అధికారులు సమన్వయంతో పనిచేసి పెండింగ్‌ సమస్యలను త్వరగా పరిష్కరించాలని సూచించారు.