బీబీనగర్, అక్టోబర్‌ 4: విద్యార్థుల ఉజ్వల భవిష్యత్‌కు బాటలు వేస్తున్న ఉపాధ్యాయుల సేవలు వెలకట్టలేనివని ట్రస్మా యాదాద్రి భువనగిరి జిల్లా అధ్యక్షుడు గొట్టిపర్తి భాస్కర్‌ అన్నారు. గురువులను గౌరవించుకోవడం సమాజ బాధ్యత అని పేర్కొన్నారు. ఈ నెల 7న యాదగిరిగుట్టలో ట్రస్మా ఆధ్వర్యంలో ‘ఆచార్యదేవోభవ’ సన్మాన మహోత్సవాన్ని నిర్వహించనున్నట్లు తెలిపారు.

బీబీనగర్‌లోని హారిక హైస్కూల్‌లో ఆదివారం నిర్వహించిన ట్రస్మా మండల జనరల్‌బాడీ సమావేశంలో ఆయన మాట్లాడారు. కార్యక్రమానికి మాజీ అధ్యక్షుడు ఈ.అచ్చయ్యగౌడ్‌ విశిష్ట అతిథిగా హాజరయ్యారు. జిల్లాలోని ప్రైవేట్‌ పాఠశాలల ఉపాధ్యాయులు, యాజమాన్యాలు పెద్ద సంఖ్యలో తరలివచ్చి కార్యక్రమాన్ని విజయవంతం చేయాలని కోరారు.

బీబీనగర్‌ మండల నూతన కమిటీ

అనంతరం బీబీనగర్‌ మండల ట్రస్మా నూతన కమిటీని ఏకగ్రీవంగా ఎన్నుకున్నారు. మండల అధ్యక్షుడిగా దేవులపల్లి బ్రహ్మం, ప్రధాన కార్యదర్శిగా చింతపట్ల నాగరాజు, కోశాధికారిగా నెల్లూరి శ్రీనివాస్, కార్యవర్గ సభ్యుడిగా జోమన్‌ కె.జాన్స్‌ ఎన్నికయ్యారు. నూతన కమిటీ సభ్యులను జిల్లా నాయకులు శాలువాలు, పూలమాలలతో సత్కరించారు. కార్యక్రమంలో జిల్లా మహిళా ట్రస్మా నాయకురాలు వైష్ణవి, వివిధ పాఠశాలల కరస్పాండెంట్లు, ఉపాధ్యాయులు పాల్గొన్నారు.