నూతన సర్పంచులకు ఐదు రోజుల శిక్షణ – అవగాహనతో ఆదర్శ గ్రామాల దిశగా అడుగులు

గ్రామ సమగ్ర అభివృద్ధిలో సర్పంచుల పాత్ర అత్యంత కీలకమని జిల్లా కలెక్టర్ తేజస్ నంద్ లాల్ పవార్ అన్నారు.

సూర్యాపేట జిల్లా కేంద్రంలోని జిల్లా ప్రజా పరిషత్ కార్యాలయంలో నూతనంగా ఎన్నికైన సర్పంచులకు ఐదు రోజుల శిక్షణ కార్యక్రమం నిర్వహిస్తున్నారు. ఈ నెల 2వ తేదీ నుంచి 7వ తేదీ వరకు మూడవ విడతగా సూర్యాపేట, ఆత్మకూర్ (ఎస్), మునగాల, చివ్వేంల, పెన్‌పహాడ్ మండలాలకు చెందిన సర్పంచులకు శిక్షణ అందిస్తున్నారు. శిక్షణ కార్యక్రమానికి హాజరైన కలెక్టర్ మాట్లాడుతూ సర్పంచులు పంచాయతీరాజ్ చట్టం, ప్రభుత్వ పథకాలపై సంపూర్ణ అవగాహన కలిగి ఉండాలని సూచించారు. గ్రామపంచాయతీ పనుల నిర్వహణ, గ్రామ అభివృద్ధి ప్రణాళికల రూపకల్పన, కుటుంబ సంక్షేమం, విద్య, ప్రజారోగ్యం, సామాజిక అభివృద్ధి వంటి అంశాలపై ఈ శిక్షణలో వివరంగా అవగాహన కల్పిస్తున్నామని తెలిపారు. ప్రతి సర్పంచ్ ఈ అవకాశాన్ని సద్వినియోగం చేసుకుని తమ గ్రామాలను ఆదర్శ గ్రామాలుగా తీర్చిదిద్దాలని కోరారు. మారుతున్న కాలానికి అనుగుణంగా సాంకేతిక పరిజ్ఞానాన్ని వినియోగించుకోవాలని, ప్రజా సౌకర్యాల మెరుగుదలకు ఆధునిక విధానాలను అవలంబించాలని సూచించారు.

కార్యక్రమంలో జిల్లా పంచాయతీ అధికారి యాదగిరి, వివిధ మండలాలకు చెందిన సర్పంచులు పాల్గొన్నారు.