ఉపసర్పంచుల చెక్ పవర్ ఆంక్షలు తొలగించాలి

తెలంగాణ రాష్ట్ర ఉప సర్పంచుల ఫోరం రాష్ట్ర కార్యదర్శి - చిన్నం బాలరాజు

రాష్ట్రంలో గ్రామ పంచాయతీల అభివృద్ధి కోసం రాష్ట్ర ప్రభుత్వం వెంటనే నిధులను విడుదల చేయాలని, ఉపసర్పంచుల చెక్ పవర్‌పై విధించిన ఆంక్షలను తక్షణమే ఎత్తివేయాలని తెలంగాణ రాష్ట్ర ఉపసర్పంచుల ఫోరం రాష్ట్ర కార్యదర్శి చిన్నం బాలరాజు డిమాండ్ చేశారు.

​నూతన పాలకవర్గాలు ఏర్పాటు అయి తొమ్మిది నెలలు గడుస్తున్నా, పంచాయతీల అభివృద్ధికి రాష్ట్ర ప్రభుత్వం ఒక్క రూపాయి కూడా విడుదల చేయలేదని ఆయన ఆరోపించారు. కేంద్ర ప్రభుత్వం కేటాయించిన నిధులను సైతం విద్యుత్ బిల్లుల పేరిట అధికారుల ద్వారా మళ్లించుకుంటూ గ్రామాల అభివృద్ధిని నిర్లక్ష్యం చేస్తున్నారని మండిపడ్డారు. అభివృద్ధి నిధుల కోసం సర్పంచులు, ఉపసర్పంచులు ఐక్యంగా ఉద్యమిస్తారనే భయంతోనే వారి మధ్య విభేదాలు సృష్టించే కుట్ర జరుగుతోందని బాలరాజు విమర్శించారు. 2018 పంచాయతీరాజ్ చట్టం ప్రకారం అవినీతికి తావులేకుండా ఉండేందుకు తీసుకొచ్చిన జాయింట్ చెక్ పవర్‌పై, ఇప్పుడు 7 రోజుల్లోగా సంతకం చేయాలంటూ ఆంక్షలు విధించడం సరికాదన్నారు. ఇది సర్పంచులు అవినీతికి పాల్పడేలా ప్రోత్సహించడమేనని ఆయన ఆందోళన వ్యక్తం చేశారు.​ఏదైనా ఉపసర్పంచ్ అకారణంగా సంతకం చేయకపోతే అధికారుల ద్వారా విచారణ జరిపి చర్యలు తీసుకోవాలే తప్ప, రాష్ట్రంలోని ఉపసర్పంచులందరిపై ఆంక్షలు మోపడం రాజ్యాంగబద్ధంగా ఎన్నికైన ప్రజాప్రతినిధులను అవమానించడమేనన్నారు. ఈ విషయంలో రాష్ట్ర ముఖ్యమంత్రి ఎనుముల రేవంత్ రెడ్డి వెంటనే స్పందించి, చెక్ పవర్‌పై ఉన్న ఆంక్షలను ఎత్తివేయాలని, ఉపసర్పంచులకు నెలకు రూ 5,000 గౌరవ వేతనం అందించాలని ఆయన డిమాండ్ చేశారు.