సర్పంచ్ శ్రీలత సుందర్ చొరవ.. ప్రారంభించిన సీఐ మన్మధకుమార్

పంతంగి గ్రామంలో ప్రజల భద్రత, నేరాల నియంత్రణ, అసాంఘిక కార్యకలాపాలపై నిఘా పెంచే ఉద్దేశంతో ఏర్పాటు చేసిన సీసీ కెమెరాల వ్యవస్థను చౌటుప్పల్ సీఐ మన్మధకుమార్, ఎస్సై నర్సిరెడ్డి మంగళవారం ప్రారంభించారు. గ్రామపంచాయతీ కార్యాలయం ఎదుట నిర్వహించిన కార్యక్రమంలో సర్పంచ్ శ్రీలత సుందర్ ప్రత్యేక చొరవతో ఈ ఏర్పాటు జరిగింది. ​ఈ సందర్భంగా సీఐ మన్మధకుమార్ మాట్లాడుతూ... గ్రామానికి చెందిన కంపెనీ ప్రతినిధులు శ్రీకాంత్, సత్యనారాయణలు రూ.5.60 లక్షల విలువైన 26 సీసీ కెమెరాలను విరాళంగా అందించడం అభినందనీయమని పేర్కొన్నారు. గ్రామమంతా నిఘా వలయంలోకి వచ్చిందని, ప్రధాన కూడళ్లు, రహదారులు, ప్రజలు ఎక్కువగా సంచరించే ప్రాంతాలపై నిరంతర నిఘా కొనసాగుతుందని తెలిపారు. ప్రజలు కూడా పోలీసులకు సహకరిస్తూ శాంతిభద్రతల పరిరక్షణకు తోడ్పడాలని కోరారు.​ఈ కార్యక్రమంలో పంచాయతీ కార్యదర్శి కే. పద్మజ, వార్డు సభ్యులు సప్పిడి ప్రభాకర్‌రెడ్డి, మాధగోని పరమేశ్వరి-శంకర్, అంతటి సౌజన్య-ప్రవీణ్, మాజీ సర్పంచులు చీరిక సంజీవరెడ్డి, అంతటి రమేష్‌గౌడ్, గ్రామ పెద్దలు, ప్రజలు పాల్గొన్నారు.