రామన్నపేట: ఉస్మానియా విశ్వవిద్యాలయంలో నిర్వహించనున్న దివ్యాంగుల సదస్సుకు ప్రభుత్వ విప్‌, నకిరేకల్‌ ఎమ్మెల్యే వేముల వీరేశంకు విశ్వవిద్యాలయాల దివ్యాంగుల ఫోరం రాష్ట్ర కమిటీ ఆహ్వానం అందించింది. ఫోరం రాష్ట్ర అధ్యక్షుడు డాక్టర్‌ ఎన్‌.అశోక్‌ నేతృత్వంలో ప్రతినిధులు వీరేశంను కలిసి సదస్సు వివరాలను తెలిపారు.

దివ్యాంగుల హక్కుల చట్టం–2016 అమలు, విద్య, ఉపాధి, సంక్షేమానికి సంబంధించిన సమస్యలపై సదస్సులో చర్చించనున్నట్లు తెలిపారు. రాష్ట్రంలోని దివ్యాంగుల సమస్యలను ప్రభుత్వం దృష్టికి తీసుకెళ్లి పరిష్కరించాలని వీరేశంను కోరారు. సదస్సుకు హాజరై సమస్యల పరిష్కారానికి కృషి చేస్తానని వీరేశం హామీ ఇచ్చారు. కార్యక్రమంలో ఫోరం రాష్ట్ర సహాయ కార్యదర్శి డాక్టర్‌ గుండ్లపల్లి నాగేశ్వర్‌ తదితరులు పాల్గొన్నారు.