నిందితులపై ఎస్సీ, ఎస్టీ అట్రాసిటీ చట్టం కింద కేసు నమోదు చేయాలి: తల్లమల్ల హసేన్. నల్లగొండ జిల్లా చింతపల్లి మండలం పీ.కే. మల్లెపల్లి గ్రామంలో గ్రామ సభ సందర్భంగా దళిత మహిళ, వీఓఏ గనిపల్లి మాధవిపై జరిగిన దాడిని మాల మహానాడు తెలంగాణ రాష్ట్ర అధ్యక్షుడు, సీనియర్ న్యాయవాది తల్లమల్ల హసేన్ తీవ్రంగా ఖండించారు. గ్రామ సభలో మాధవిని అసభ్య పదజాలంతో దూషిస్తూ దాడికి పాల్పడటం ఆందోళనకరమన్నారు. ఘటనకు సంబంధించిన దృశ్యాలు కూడా వెలుగులోకి వచ్చాయని తెలిపారు. బాధితురాలిపై దాడి చేసిన వారిపై ఎస్సీ, ఎస్టీ అట్రాసిటీ చట్టంతో పాటు వర్తించే ఇతర చట్టాల కింద కేసులు నమోదు చేసి కఠినంగా శిక్షించాలని డిమాండ్ చేశారు. బాధిత మహిళకు తక్షణ రక్షణ కల్పించి న్యాయం చేయాలని ప్రభుత్వాన్ని కోరారు. కుల వివక్ష, దాడులకు వ్యతిరేకంగా ప్రజాస్వామ్యవాదులు, మహిళా సంఘాలు, విద్యార్థులు, మేధావులు గొంతెత్తాలని పిలుపునిచ్చారు. దళితులు, గిరిజనుల ఆత్మగౌరవం, రక్షణ కోసం మాల మహానాడు నిరంతరం పోరాడుతుందని స్పష్టం చేశారు.