ఏలూరు జిల్లా చింతలపూడి మండలం చింతలపూడి గ్రామానికి చెందిన దుగ్గిరాల రామకృష్ణ చిన్నంపేటలోని కోటపాడు రోడ్డులో ఉన్న తన పొలానికి వెళ్తుండగా ప్రమాదానికి గురయ్యారు. చిన్నంపేట ఎస్సీ పేటలో అంగన్వాడీ కేంద్రం వద్ద రహదారి తీవ్రంగా దెబ్బతినడంతో గోతిలో పడిపోయి ఆయన ఎడమ కాలు గుత్తిలో విరిగిపోయింది. తలకు కూడా గాయాలు కావడంతో స్థానికులు వెంటనే సహాయం చేసి చికిత్స కోసం తరలించారు. పెద్ద ప్రమాదం తప్పడంతో కుటుంబ సభ్యులు, గ్రామస్తులు ఊపిరి పీల్చుకున్నారు.

ఈ సందర్భంగా సీపీఐ అనుబంధ చాట్రాయి వ్యవసాయ కార్మిక సంఘం మండల కార్యదర్శి కొమ్ము ఆనందం మాట్లాడుతూ చిన్నంపేట నుంచి కోటపాడు వెళ్లే రహదారి పూర్తిగా గోతులతో నిండిపోయిందని అన్నారు. ఈ రహదారిపై తరచూ ప్రజలు ప్రమాదాలకు గురవుతున్నారని తెలిపారు.

అధికారులు వెంటనే స్పందించి రహదారిని మరమ్మతులు చేయించి పక్కాగా రోడ్డు వేయాలని, ప్రజల ప్రాణాలు కాపాడాలని ప్రభుత్వాన్ని మరియు ఉన్నతాధికారులను ఆయన కోరారు.