చిన్నకాపర్తి, చిట్యాల మండలం: రానున్న వేసవిలో గ్రామంలో తాగునీటి సమస్య తలెత్తకుండా ముందస్తు చర్యలతో చిన్నకాపర్తి గ్రామ పంచాయతీ ముందడుగు వేసింది. ఇంటింటికీ సాగర్ నీళ్లు అందించాలనే లక్ష్యంతో గ్రామ సర్పంచ్ ఆవుల సుందరయ్య యాదవ్ ప్రత్యేక చర్యలు చేపట్టారు.గ్రామ పంచాయతీ పరిధిలోని ప్రతి ఇంటికి నాణ్యమైన తాగునీరు సరఫరా చేయాలనే ఉద్దేశంతో ప్రధాన పైప్‌లైన్‌లను మరమ్మతు చేయించడంతో పాటు గ్రామంలో మొత్తం ఐదు గేట్‌వాల్వులను అమర్చి శుక్రవారం ప్రారంభించారు. గ్రామ పంచాయతీ కార్యాలయానికి వెళ్లే దారిలో ఉన్న ప్రధాన పైప్‌లైన్‌ను సరిచేసి, 8వ వార్డులో రెండు గేట్‌వాల్వులు, 9వ వార్డులో ఒక గేట్‌వాల్వును నూతనంగా ఏర్పాటు చేసి ప్రారంభించారు.

ఈ చర్యలతో నీటి పంపిణీ మరింత సక్రమంగా జరుగుతుందని సర్పంచ్ ఆశాభావం వ్యక్తం చేశారు. వేసవి కాలంలో గ్రామంలో తాగునీటి కొరత లేకుండా చూడడమే తమ ప్రధాన లక్ష్యమని తెలిపారు. గ్రామ ప్రజల అవసరాలను దృష్టిలో ఉంచుకుని ముందస్తు ప్రణాళికతో పనులు చేపట్టామని పేర్కొన్నారు.

ఈ కార్యక్రమంలో వార్డ్ సభ్యులు రుద్రారపు లక్ష్మణ్, రొండి నర్సింహా, పల్లపు పరమేశ్వరి ప్రశాంత్, ఈరమళ్ళ దయాకర్, వలిగొండ కవిత సత్యనారాయణ, దేశాపాక మధు, పెర్కా నాగరాజు, మాజీ సర్పంచ్ వలిగొండ సోమయ్య, కాంగ్రెస్ పార్టీ గ్రామ శాఖ ఉపాధ్యక్షుడు నందిపటి మహేష్, సామాజిక కార్యకర్త పొలిమేర దశరథ తదితరులు పాల్గొన్నారు.

గ్రామంలో అభివృద్ధి పనులు ఇదే విధంగా కొనసాగిస్తామని సర్పంచ్ తెలిపారు.