ఆధ్యాత్మిక సేవా కార్యక్రమాలకు గుర్తింపుగా ఎంపిక

చౌటుప్పల్ స్థానికం ప్రతినిధి:

ఉత్తరప్రదేశ్‌లోని అయోధ్యలో పద్మశాలీ సమాజం ఆధ్వర్యంలో అంతర్జాతీయ ప్రమాణాలతో నిర్మించతలపెట్టిన ‘శ్రీ భక్త మార్కండేయ పద్మశాలీయ నిత్యాన్నసత్రం’ ధర్మకర్తల సంఘ సభ్యునిగా చౌటుప్పల్‌కు చెందిన బడుగు బాలరాజు ఎంపికయ్యారు. ఈ మేరకు అయోధ్య అన్నసత్ర నిర్మాణ ధర్మకర్తగా ఆయనను నియమిస్తూ కమిటీ బాధ్యతలు అప్పగించింది.​గత కొన్ని దశాబ్దాలుగా హిందూ సనాతన ధర్మం, ఆధ్యాత్మిక, ధార్మిక, సాంస్కృతిక వికాసానికి బాలరాజు అందిస్తున్న సేవలను గుర్తించి ఈ బాధ్యతలను కేటాయించారు. అఖిల భారత పద్మశాలీయ నిత్యాన్నసత్రముల మార్గదర్శకులు చిలువేరు కాశీనాథ్, అయోధ్య అన్నసత్ర అధ్యక్షులు భూరం శంకర్, కార్యదర్శి గజం గురునాథంల సూచనల మేరకు ఈ ఎంపిక జరిగింది. తనపై నమ్మకంతో ఈ బాధ్యత అప్పగించిన పద్మశాలీయ ప్రముఖులకు బాలరాజు ప్రత్యేక ధన్యవాదాలు తెలిపారు. ఈ సందర్భంగా ఆయన మాట్లాడుతూ... శ్రీరామచంద్రుని దివ్యక్షేత్రమైన అయోధ్యకు వచ్చే భక్తుల కోసం అన్ని రకాల వసతులు, ఉచిత భోజన సౌకర్యాలతో ఈ నిత్యాన్నసత్రాన్ని నిర్మిస్తున్నట్లు పేర్కొన్నారు. యాదాద్రి భువనగిరి జిల్లాలోని పద్మశాలీ సోదరుల సహకారంతో అన్నసత్ర నిర్మాణానికి తనవంతు పూర్తి తోడ్పాటు అందిస్తానని వెల్లడించారు. బాలరాజు ఎంపిక పట్ల పలువురు ఆధ్యాత్మిక వేత్తలు, స్థానిక ప్రముఖులు హర్షం వ్యక్తం చేశారు.