‘రెడీ టూ సర్వ్‌’, ‘నవదీప’ ఫౌండేషన్ల సేవా కార్యక్రమం

హైదరాబాద్‌, అక్టోబర్‌ 4: వైద్యం కోసం నగరానికి వచ్చి ఆర్థిక ఇబ్బందులతో సతమతమవుతున్న నిరుపేద రోగులు, వారి కుటుంబ సభ్యులకు ‘రెడీ టూ సర్వ్‌ ఫౌండేషన్‌’, ‘నవదీప ఫౌండేషన్‌’లు అండగా నిలిచాయి. బంజారాహిల్స్‌లోని బసవతారకం ఇండో–అమెరికన్‌ క్యాన్సర్‌ ఆసుపత్రి వద్ద ఆదివారం సంయుక్తంగా అన్నదాన కార్యక్రమం నిర్వహించాయి. ఈ సందర్భంగా సుమారు 300 మంది రోగులు, వారి సహాయకులు, ఇతర అవసరార్థులకు ఉచితంగా నాణ్యమైన భోజనాన్ని అందించారు.

స్వచ్ఛంద సేవకులు ఉత్సాహంగా పాల్గొని రోగులు, వారి కుటుంబ సభ్యులకు ప్రేమతో భోజనం వడ్డించారు. సుదూర ప్రాంతాల నుంచి చికిత్స కోసం వచ్చి నగరంలో వసతి, భోజన ఖర్చులు భరించలేని తమకు అన్నదానం ఎంతో ఆసరాగా నిలిచిందని లబ్ధిదారులు తెలిపారు. నిర్వాహకులకు కృతజ్ఞతలు తెలిపారు.

సేవలను మరింత విస్తరిస్తాం

ఆకలితో ఇబ్బందులు పడుతున్న వారికి అండగా నిలవాలనే సంకల్పంతో ఈ కార్యక్రమాన్ని చేపట్టినట్లు ఫౌండేషన్‌ ప్రతినిధులు తెలిపారు. పేదల అవసరాలను దృష్టిలో ఉంచుకుని భవిష్యత్తులో నగరంలోని మరిన్ని ప్రాంతాల్లో ఉచిత అన్నదాన కార్యక్రమాలను విస్తరిస్తామని వెల్లడించారు.

దాతలు ముందుకు రావాలి

రెడీ టూ సర్వ్‌ ఫౌండేషన్‌ ముఖ్య నిర్వాహకులు పెద్ది శంకర్‌ మాట్లాడుతూ.. సామాజిక సేవ ప్రతి ఒక్కరి బాధ్యత కావాలని అన్నారు. మానవత్వంతో సేవా కార్యక్రమాల్లో భాగస్వాములు కావాలనుకునే దాతలు, స్వచ్ఛంద సేవకులు ముందుకు వచ్చి తమకు సహకరించాలని పిలుపునిచ్చారు. మరింత మంది దాతలు భాగస్వాములైతే ఆకలితో ఉన్న వారికి విస్తృతంగా సేవలు అందించవచ్చని ఆశాభావం వ్యక్తం చేశారు. ఫౌండేషన్ల సేవా కార్యక్రమాలను పలువురు ప్రముఖులు, స్థానికులు అభినందించారు.