నల్గొండ: యాదాద్రి థర్మల్ పవర్ స్టేషన్‌లో ఆదివారం అగ్నిప్రమాదం చోటుచేసుకుంది. ప్లాంట్‌లోని యూనిట్-3 పరిధిలో ఒక్కసారిగా మంటలు చెలరేగడంతో ఆ ప్రాంతమంతా దట్టమైన పొగ అలుముకుంది.

టర్బైన్ డ్రైవెన్ బాయిలర్ ఫీడ్ పంప్ ప్రాంతంలో ప్రమాదం సంభవించినట్లు అధికారులు తెలిపారు. పంప్ వద్ద ఆయిల్ లీకేజీ కారణంగానే మంటలు చెలరేగినట్లు ప్రాథమికంగా భావిస్తున్నారు.

ఈ ఘటనలో కంట్రోల్ కేబుల్స్, వాల్వ్‌లు దెబ్బతిన్నట్లు సమాచారం. అయితే ప్రధాన యంత్రాలకు ఎలాంటి ప్రమాదం జరగలేదని అధికారులు వెల్లడించారు.

అగ్నిమాపక సిబ్బంది వెంటనే స్పందించి మంటలను అదుపులోకి తీసుకొచ్చారు. ఘటనపై విచారణ కొనసాగుతోంది.