సూర్యాపేట జిల్లా: తెలంగాణలో కోతుల బెడద రోజురోజుకూ పెరుగుతోంది. పలు గ్రామాల్లో ప్రజలపై కోతులు దాడులు చేస్తుండటంతో జనం తీవ్ర భయాందోళనకు గురవుతున్నారు. తాజాగా సూర్యాపేట జిల్లా వల్లాపురంలో విషాదకర ఘటన చోటుచేసుకుంది.

గ్రామానికి చెందిన నిశాంక్ (12) తన అమ్మమ్మ ఇంటికి వెళ్తుండగా కోతులు అతడిని వెంటపడ్డాయి. దీంతో భయాందోళనకు గురైన బాలుడు కిందపడిపోయాడు. ఈ ఘటనలో బాలుడి గుండె ఆగిపోయినట్లు సమాచారం. వెంటనే అతడిని ఆసుపత్రికి తరలించగా అప్పటికే మృతి చెందినట్లు తెలిసింది.

బాలుడి మృతదేహాన్ని పోస్టుమార్టం నిమిత్తం కోదాడ ప్రభుత్వ ఆసుపత్రికి తరలించారు. వైద్యులు గుండెపోటు కారణంగా మృతి చెందినట్లు నిర్ధారించినట్లు సమాచారం.

ఈ ఘటనతో వల్లాపురంలో విషాదఛాయలు అలుముకున్నాయి. గ్రామాల్లో కోతుల బెడదను అరికట్టేందుకు అధికారులు తక్షణ చర్యలు తీసుకోవాలని, ప్రజలకు రక్షణ కల్పించాలని స్థానికులు కోరుతున్నారు.