ఆదోని, తమిళనాడు రాష్ట్ర ముఖ్యమంత్రిగా ప్రమాణ స్వీకారం చేసిన టీవీకే అధినేత దళపతి సి. జోసెఫ్ విజయ్‌కు ఎంహెచ్‌పీఎస్ ఏపీ రాష్ట్ర కార్యదర్శి ఎ. నూర్ అహ్మద్ అభినందనలు తెలిపారు. ఈ సందర్భంగా తమిళ ప్రజలకు, టీవీకే పార్టీ శ్రేణులకు శుభాకాంక్షలు తెలియజేశారు.

అత్యంత సాధారణ వ్యక్తులను ఎమ్మెల్యేలుగా గెలిపించడం, ఓటుకు డబ్బు, మద్యం పంపిణీ చేయకుండా ఎన్నికల్లో విజయం సాధించడం విశేషమన్నారు. కుల, మత రాజకీయాలకు దూరంగా ఉండి ప్రజల మధ్య విద్వేషాలు రెచ్చగొట్టే వ్యాఖ్యలు చేయకుండా విజయ్ ప్రజాభిమానాన్ని పొందారని పేర్కొన్నారు.

ఎన్నికల్లో ముఖ్యంగా 26 సంవత్సరాల లోపు యువత పెద్దఎత్తున విజయ్‌కు మద్దతుగా నిలవడం యువత మార్పు, స్వచ్ఛమైన రాజకీయాలను కోరుకుంటున్నారనే విషయాన్ని స్పష్టం చేసిందన్నారు. మెజారిటీ కోసం అడ్డదారులు తొక్కకుండా ప్రజాస్వామ్య పద్ధతిలో ఇతర పార్టీల మద్దతు కూడగట్టుకోవడం ఆదర్శనీయమని కొనియాడారు.

తమిళనాడులో విజయ్ పాలన దేశానికి ఆదర్శంగా నిలవాలని ఆకాంక్షించారు.