వర్షాభావంతో గ్రామస్తుల వినూత్న ప్రార్థన.. శాస్తోక్తంగా వివాహం, విందు భోజనాలతో సందడి

బెళగావి, జూలై 6:

వర్షాలు ముఖం చాటేయడంతో రైతుల్లో ఆందోళన నెలకొన్న వేళ, వానదేవుడి కరుణ కోసం గ్రామస్తులు సంప్రదాయ విశ్వాసాలకు ఆశ్రయించారు. కర్ణాటక రాష్ట్రంలోని బెళగావి జిల్లా మూడలగి తాలూకా మున్యాళ గ్రామంలో గాడిదలకు ఘనంగా వివాహం జరిపించి వర్షాల కోసం ప్రత్యేక ప్రార్థనలు నిర్వహించారు.గ్రామస్తులు మగ గాడిదకు ‘కాంతేశ్’, ఆడ గాడిదకు ‘కస్తూరి’ అని పేర్లు పెట్టి, పండితుల మంత్రోచ్చారణల మధ్య శాస్త్రోక్తంగా పెళ్లి జరిపించారు. వివాహ వేడుకకు గ్రామ ప్రజలు పెద్ద సంఖ్యలో హాజరై నూతన వధూవరులను ఆశీర్వదించారు.

పెళ్లి అనంతరం అతిథుల కోసం ప్రత్యేకంగా విందు భోజనాలు ఏర్పాటు చేయడం విశేషం. గ్రామంలో పండుగ వాతావరణం నెలకొనగా, ఈ వినూత్న కార్యక్రమం స్థానికంగా ఆసక్తికర చర్చకు దారితీసింది.ఈ సందర్భంగా గ్రామ పెద్దలు మాట్లాడుతూ, ఈ ఏడాది ఆశించిన మేర వర్షాలు కురవక పంటలు ఎండిపోతున్నాయని ఆవేదన వ్యక్తం చేశారు. పూర్వీకుల కాలం నుంచి వస్తున్న ఆచారం ప్రకారం గాడిదలకు వివాహం జరిపిస్తే మంచి వర్షాలు కురుస్తాయని విశ్వాసం ఉందని తెలిపారు.వర్షాభావం తీవ్రంగా ఉన్న నేపథ్యంలో రైతులు ప్రకృతి అనుకూలించాలని ప్రార్థిస్తూ నిర్వహించిన ఈ కార్యక్రమం అందరి దృష్టిని ఆకర్షించింది. గ్రామీణ సంప్రదాయాలు, విశ్వాసాలకు నిదర్శనంగా నిలిచిన ఈ సంఘటన ప్రస్తుతం సామాజిక మాధ్యమాల్లో వైరల్‌గా మారింది.