వల్లభరావు చెరువు వద్ద వినాయక నిమజ్జన ఏర్పాట్ల పరిశీలన..

కలెక్టర్ బి. చంద్రశేఖర్, ఎస్పీ శరత్ చంద్ర పవార్ తనిఖీ అధికారులు అప్రమత్తంగా ఉండాలని ఆదేశం..

నల్గొండ: నల్గొండ పట్టణ సమీపంలోని వల్లభరావు చెరువు వద్ద వినాయక విగ్రహాల నిమజ్జనానికి చేసిన ఏర్పాట్లను జిల్లా కలెక్టర్ బి. చంద్రశేఖర్, జిల్లా ఎస్పీ శరత్ చంద్ర పవార్‌తో కలిసి మంగళవారం రాత్రి క్షేత్రస్థాయిలో పరిశీలించారు. ఈ సందర్భంగా చెరువు వద్ద ఏర్పాటు చేసిన క్రేన్లు, బ్యారికేడింగ్, విద్యుత్ దీపాల వెలుగులు (లైటింగ్) తదితర వసతులను కలెక్టర్ సునిశితంగా తనిఖీ చేశారు.

అనంతరం ఆయన మాట్లాడుతూ... గణేష్ నిమజ్జన పర్వదినం సందర్భంగా భక్తులకు, నిర్వాహకులకు ఎలాంటి ఇబ్బందులు తలెత్తకుండా పక్కా చర్యలు తీసుకోవాలని సంబంధిత అధికారులను ఆదేశించారు. నిమజ్జన ప్రక్రియ ప్రశాంతంగా, వేగవంతంగా పూర్తయ్యేలా వివిధ శాఖల అధికారులు, సిబ్బందిని విధుల్లో నియమించామని తెలిపారు. కేటాయించిన సిబ్బంది అంతా సమయానికి విధులకు హాజరయ్యేలా చూడాలని, ప్రత్యేకంగా ఈతగాళ్లు, పోలీస్, అగ్నిమాపక శకటాల సిబ్బంది ఎల్లప్పుడూ అప్రమత్తంగా ఉండాలని స్పష్టం చేశారు.శాంతిభద్రతల దృష్ట్యా చేపట్టిన బందోబస్తు ఏర్పాట్లను జిల్లా ఎస్పీ శరత్ చంద్ర పవార్ ప్రత్యేకంగా సమీక్షించారు. చెరువు పరిసర ప్రాంతాల్లో ఎక్కడా తోపులాటలు జరగకుండా, ట్రాఫిక్ సమస్యలు తలెత్తకుండా పోలీస్ బలగాలను మోహరించినట్లు తెలిపారు. ఈ తనిఖీ కార్యక్రమంలో నల్గొండ ఆర్డీవో వై. అశోక్ రెడ్డి, డిఎస్పి శివరామిరెడ్డి, మున్సిపల్ కమిషనర్ వంశీకృష్ణతో పాటు వివిధ శాఖల ముఖ్య అధికారులు పాల్గొన్నారు.