తెలంగాణ రాష్ట్ర ఆవిర్భావ దినోత్సవ వేడుకల్లో విద్యాశాఖ ఏర్పాటు చేసిన ఫ్లెక్సీ వివాదాస్పదంగా మారింది. కలెక్టరేట్‌లో ఏర్పాటు చేసిన విద్యాశాఖ స్టాల్‌లో ప్రముఖుల ఫొటోల కింద తప్పుగా పేర్లు, హోదాలు ముద్రించడంతో అధికారులు, ప్రజాప్రతినిధులు అవాక్కయ్యారు.

ఫ్లెక్సీలో ముఖ్యమంత్రి రేవంత్‌రెడ్డి ఫొటో కింద జిల్లా విద్యాశాఖ అధికారి (డీఈవో) పేరు ముద్రించగా, మంత్రి ఉత్తమ్‌కుమార్‌రెడ్డి ఫొటో కింద జిల్లా కలెక్టర్, జిల్లా మేజిస్ట్రేట్ హోదాను పేర్కొనడం చర్చనీయాంశంగా మారింది. కార్యక్రమానికి వచ్చిన పలువురు అధికారులు, ప్రజాప్రతినిధులు ఈ తప్పిదాన్ని చూసి ఆశ్చర్యం వ్యక్తం చేశారు.

విద్యార్థులకు విద్యాబోధన చేసే శాఖే అధికారిక కార్యక్రమంలో ఇలాంటి నిర్లక్ష్యానికి పాల్పడటంపై విమర్శలు వెల్లువెత్తుతున్నాయి. ఫ్లెక్సీ తయారీ నుంచి ప్రదర్శన వరకు ఎవరూ పరిశీలించలేదా? అనే ప్రశ్నలు వ్యక్తమవుతున్నాయి. చిన్నపాటి తప్పిదంగా కాకుండా శాఖ ప్రతిష్ఠను దెబ్బతీసే ఘటనగా పలువురు అభివర్ణిస్తున్నారు.

ఫ్లెక్సీ ఏర్పాటులో బాధ్యులైన అధికారుల నిర్లక్ష్యంపై విచారణ జరిపి చర్యలు తీసుకోవాలని పలువురు డిమాండ్ చేస్తున్నారు.