15 రోజుల్లో ప్రత్యామ్నాయ పేర్లు సూచించాలని ఆదేశం.. లేకపోతే దరఖాస్తు మూసివేత హెచ్చరిక.

హైదరాబాద్, జూలై 4:

ఎమ్మెల్సీ కవిత ప్రకటించిన కొత్త రాజకీయ పార్టీ తెలంగాణ రక్షణ సేన (టీఆర్ఎస్) పేరుపై కేంద్ర ఎన్నికల సంఘం కీలక నిర్ణయం తీసుకుంది. పార్టీ పేరుకు సంబంధించి ప్రజల నుంచి పలు అభ్యంతరాలు అందిన నేపథ్యంలో ప్రస్తుతం ప్రతిపాదించిన "టీఆర్ఎస్" పేరును ఆమోదించడం సాధ్యం కాదని స్పష్టం చేసింది.ఈ మేరకు కవితకు ఎన్నికల సంఘం లేఖ రాసి, 15 రోజుల లోపు మూడు ప్రత్యామ్నాయ పార్టీ పేర్లను సూచించాలని ఆదేశించింది. నిర్ణీత గడువులో కొత్త పేర్లను సమర్పించకపోతే ఎలాంటి తదుపరి సమాచారం ఇవ్వకుండా పార్టీ నమోదు దరఖాస్తును మూసివేస్తామని హెచ్చరించింది.గతంలో తెలంగాణ రాష్ట్ర సమితి (టీఆర్ఎస్) పేరుతో రాష్ట్ర రాజకీయాల్లో కీలక పాత్ర పోషించిన పార్టీ ప్రస్తుతం భారత్ రాష్ట్ర సమితి (బీఆర్ఎస్)గా మారిన నేపథ్యంలో, అదే సంక్షిప్త నామంతో మరో పార్టీ నమోదు చేయాలన్న ప్రతిపాదనపై అభ్యంతరాలు వ్యక్తమయ్యాయి. ఈ అంశాన్ని పరిశీలించిన ఎన్నికల సంఘం ప్రజల్లో గందరగోళం తలెత్తే అవకాశం ఉందని అభిప్రాయపడినట్లు తెలుస్తోంది.

దీంతో కవిత కొత్త పార్టీకి కొత్త పేరు ఖరారు చేసే ప్రక్రియపై రాజకీయ వర్గాల్లో ఆసక్తి నెలకొంది. ఎన్నికల సంఘం తాజా ఆదేశాల నేపథ్యంలో పార్టీ భవిష్యత్ వ్యూహంపై త్వరలో స్పష్టత వచ్చే అవకాశం ఉంది.