సంగారెడ్డి జిల్లా అడిషనల్ కలెక్టర్ (రెవెన్యూ)గా టి.ఎల్. సంగీత బుధవారం అధికారికంగా బాధ్యతలు స్వీకరించారు. కలెక్టరేట్ కార్యాలయంలో జరిగిన కార్యక్రమంలో ఆమె పదవీ బాధ్యతలు చేపట్టగా, కలెక్టరేట్ అధికారులు, సిబ్బంది ఘన స్వాగతం పలికి పుష్పగుచ్చాలు అందజేసి అభినందనలు తెలిపారు. అనంతరం రెవెన్యూ శాఖకు చెందిన అధికారులు మర్యాదపూర్వకంగా కలిసి శుభాకాంక్షలు తెలియజేయగా, ఆమె అధికారులతో సన్నిహితంగా పరిచయం చేసుకుని శాఖల వారీగా జరుగుతున్న పనితీరుపై వివరాలు తెలుసుకున్నారు. ఈ సందర్భంగా టి.ఎల్. సంగీత మాట్లాడుతూ జిల్లా అభివృద్ధి, రెవెన్యూ పరిపాలనను మరింత సమర్థవంతంగా, పారదర్శకంగా ముందుకు తీసుకెళ్లేందుకు కృషి చేస్తానని, ప్రజలకు వేగవంతమైన సేవలు అందించడమే తన ప్రధాన లక్ష్యమని తెలిపారు. ప్రభుత్వం అమలు చేస్తున్న సంక్షేమ, అభివృద్ధి కార్యక్రమాలు ప్రజలకు సమర్థంగా చేరేలా అధికారులతో సమన్వయం చేసుకుంటూ పనిచేస్తానని పేర్కొన్నారు.