రామన్నపేట, : ఓటరు జాబితాలో అర్హులైన ప్రతి ఒక్కరి పేరు నమోదయ్యేలా కృషి చేస్తున్న బెస్ట్ సేవా సొసైటీ, కక్కిరేణి గ్రామంలో ప్రత్యేక సహాయ కేంద్రాన్ని ఏర్పాటు చేసి SIR (స్పెషల్ ఇంటెన్సివ్ రివిజన్) ఫారాల భర్తీకి ఉచిత సేవలు అందిస్తోంది. నిరక్షరాస్యులు, కొత్త ఓటర్లు, వివాహానంతరం గ్రామానికి వచ్చిన మహిళలు, వలస కుటుంబాలకు చెందిన ఓటర్లు ఇబ్బందులు పడకుండా స్వచ్ఛందంగా సహకారం అందిస్తోంది.

సంస్థ వ్యవస్థాపకులు బుక్కా ఈశ్వరయ్య మాట్లాడుతూ, SIR ప్రక్రియపై గ్రామస్థుల్లో అవగాహన పెంచడంతో పాటు ఫారాల భర్తీ, పాత ఓటరు వివరాల గుర్తింపు, అవసరమైన పత్రాల పరిశీలనలో పూర్తి సహాయం చేస్తున్నామని తెలిపారు. ప్రజల సౌకర్యార్థం 2002 నాటి ఓటరు జాబితాతో పాటు తాజా ఓటరు జాబితాను అందుబాటులో ఉంచి అర్హులైన ప్రతి ఓటరు పేరు నమోదయ్యేలా చర్యలు చేపట్టామని చెప్పారు.

SIR ప్రక్రియకు సంబంధించిన సందేహాల నివృత్తికి సంబంధిత BLO, ERO అధికారులను సంప్రదించాలని, బెస్ట్ సేవా సొసైటీ తరఫున కూడా అవసరమైన మార్గదర్శకత్వం అందిస్తున్నామని ఆర్గనైజర్ వేముల సైదులు తెలిపారు. ఈ సేవలకు గ్రామ ప్రజల నుంచి మంచి స్పందన లభిస్తోందన్నారు.

ఈ కార్యక్రమంలో పాపని జయప్రకాష్, లింగస్వామి, నరేష్, నరేందర్, లింగయ్య, నరసమ్మ, అంజమ్మ, సత్తమ్మ, నర్సమ్మతో పాటు గ్రామ యువకులు, మహిళలు, పలువురు గ్రామస్థులు పాల్గొన్నారు.