ప్రజా పాలన - ప్రగతి ప్రణాళిక కార్యక్రమంలో భాగంగా నారాయణఖేడ్ మున్సిపల్ పట్టణంలోని బాలసదనంలో ‘మిషన్ శక్తి - బేటీ బచావో బేటీ పడావో’ పథకం కింద నిర్వహించిన వొకేషనల్ టైలరింగ్ శిక్షణ కార్యక్రమం విజయవంతంగా ముగిసింది. ఈ సందర్భంగా ఏర్పాటు చేసిన ముగింపు వేడుకలో నారాయణఖేడ్ ఎమ్మెల్యే డాక్టర్ పట్లోళ్ల సంజీవరెడ్డి ముఖ్య అతిథిగా పాల్గొని శిక్షణ పూర్తి చేసుకున్న బాలికలకు సర్టిఫికెట్లను పంపిణీ చేసి శుభాకాంక్షలు తెలియజేశారు. ఈ సందర్భంగా ఎమ్మెల్యే మాట్లాడుతూ ప్రభుత్వం మహిళా సాధికారతకు పెద్దపీట వేస్తోందని, బాలికలు స్వయం ఉపాధి ద్వారా ఆర్థికంగా ఎదగాలనే ఉద్దేశంతో ఇలాంటి శిక్షణ కార్యక్రమాలను నిర్వహిస్తున్నట్లు తెలిపారు. టైలరింగ్ వంటి వృత్తి నైపుణ్యాలు భవిష్యత్తులో బాలికలకు ఉపాధి అవకాశాలను కల్పించడమే కాకుండా ఆత్మవిశ్వాసాన్ని పెంచుతాయని పేర్కొన్నారు. ‘బేటీ బచావో బేటీ పడావో’ స్ఫూర్తితో బాలికలు చదువుతో పాటు అన్ని రంగాల్లో రాణించి ఉన్నత స్థాయికి చేరుకోవాలని ఆకాంక్షించారు. భవిష్యత్తులో కూడా మహిళలు, యువతుల కోసం ఇలాంటి మరిన్ని శిక్షణ కార్యక్రమాలను నిర్వహిస్తామని హామీ ఇచ్చారు. ఈ కార్యక్రమంలో స్థానిక నాయకులు, బాలసదన నిర్వాహకులు, మున్సిపల్ అధికారులు, శిక్షణ సిబ్బంది మరియు విద్యార్థినులు పాల్గొన్నారు.