చౌటుప్పల్ మున్సిపల్ కమిషనర్‌కు టీజీ ఎంపిఎస్ వినతి

పట్టణ కేంద్రంలో రూ.50 లక్షల అంచనా వ్యయంతో నిర్మించిన గొర్రెల మార్కెట్ యార్డును తక్షణమే అందుబాటులోకి తీసుకురావాలని తెలంగాణ గొర్రెల మేకల పెంపకందారుల సంఘం (టీజీ ఎంపీఎస్) నాయకులు డిమాండ్ చేశారు. ఈ మేరకు గురువారం మున్సిపల్ కమిషనర్ వెంకటేశ్వర నాయక్‌కు వినతిపత్రం అందజేశారు.

స్థానిక వృత్తిదారుల కార్యాలయంలో గుణముని ఐలయ్య అధ్యక్షతన మండల కమిటీ ముఖ్య నాయకుల సమావేశం నిర్వహించారు. సమావేశంలో ఉమ్మడి నల్లగొండ జిల్లా గొర్రెల పెంపకందారుల సహకార సంఘం యూనియన్ డైరెక్టర్ బండారు నరసింహ, టీజీ ఎంపీఎస్ రాష్ట్ర కమిటీ సభ్యుడు కొండే శ్రీశైలం పాల్గొని మాట్లాడారు. మార్కెట్ యార్డును పూర్తి చేసినా ఇప్పటికీ వినియోగంలోకి తేకపోవడం దారుణమన్నారు. యార్డులోని మంచినీటి బోరు మోటారు, జీవాల కోసం నిర్మించిన నల్లాలను ధ్వంసం చేసి దొంగిలించిన వారిపై చట్టపరమైన చర్యలు తీసుకోవాలని కోరారు.​సమస్యలు పరిష్కరించాలి.. జీవాలకు సకాలంలో నట్టల నివారణ మందులు పంపిణీ చేయడంతో పాటు మందల వద్దకే వెళ్లి వైద్య సేవలు అందించేలా చర్యలు తీసుకోవాలని కోరారు. ప్రతి గ్రామంలోనూ మూగజీవాలకు నీటి తొట్లు ఏర్పాటు చేయాలని, ప్రభుత్వం ప్రకటించిన ఇన్సూరెన్స్ సౌకర్యాన్ని పూర్తిస్థాయిలో అమలు చేసి పెంపకందారులను ఆదుకోవాలని విజ్ఞప్తి చేశారు.​ఈ కార్యక్రమంలో మున్సిపల్ 12వ వార్డు కౌన్సిలర్ పాక చిరంజీవి, టీజీ ఎంపీఎస్ మండల అధ్యక్షుడు భీమనగని బాలరాజ్, మున్సిపల్ కన్వీనర్ గుణమోని ఐలయ్య, జిల్లా ఉపాధ్యక్షుడు నారీ వెంకటేశం, నాయకులు గజ్జి పాండు, గడగోటి జంగయ్య, జెనిగల యాదయ్య, అరిగే బీరప్ప, గాజుల అంజయ్య తదితరులు పాల్గొన్నారు.