నల్గొండ జిల్లా చర్లపల్లిలో మంగళవారం ఉమ్మడి నల్గొండ జిల్లా ఫుట్‌బాల్ గర్ల్స్ జూనియర్ అసోసియేషన్ ఆధ్వర్యంలో నిర్వహించిన అండర్-17 జూనియర్ బాలికల జిల్లా స్థాయి ఎంపిక పోటీల్లో యాదాద్రి భువనగిరి జిల్లా, మల్కాపూర్ పీఎం జిల్లా పరిషత్ ఉన్నత పాఠశాలకు చెందిన 10వ తరగతి విద్యార్థిని యు. మేఘన అత్యుత్తమ ప్రతిభ కనబరిచి రాష్ట్రస్థాయి పోటీలకు ఎంపికైంది. ​ఈ నెల (సెప్టెంబరు) 4వ తేదీ నుంచి 7వ తేదీ వరకు నిజామాబాద్‌ జిల్లాలో జరగనున్న రాష్ట్రస్థాయి ఫుట్‌బాల్ పోటీల్లో మేఘన ఉమ్మడి జిల్లా తరఫున ప్రాతినిధ్యం వహించనుంది. రాష్ట్రస్థాయికి ఎంపికైన విద్యార్థిని మేఘనను మల్కాపూర్ సర్పంచ్ నిరంజన్ గౌడ్, ఉపసర్పంచ్ నరసింహ, మండల విద్యాశాఖాధికారి గురువారావు, పాఠశాల ప్రధానోపాధ్యాయురాలు శోభ, ఫిజికల్ డైరెక్టర్ భావన, పాఠశాల ఉపాధ్యాయ బృందం ప్రత్యేకంగా అభినందించారు.​ఈ సందర్భంగా గ్రామ సర్పంచ్ నిరంజన్ గౌడ్ మాట్లాడుతూ.. మేఘన రాష్ట్రస్థాయి పోటీల్లోనూ విజయం సాధించి పాఠశాలకు, గ్రామానికి మంచి పేరు తీసుకురావాలని ఆకాంక్షించారు. విద్యార్థిని క్రీడా ప్రోత్సహకం కింద సర్పంచ్ తన వంతుగా ఆర్థిక సహాయాన్ని అందిస్తామని హామీ ఇచ్చారు.