లోక్‌సభ ప్రతిపక్ష నేత రాహుల్ గాంధీ జన్మదిన వేడుకలను టీపీసీసీ వర్కింగ్ ప్రెసిడెంట్ జగ్గారెడ్డి ఆధ్వర్యంలో సంగారెడ్డిలో ఘనంగా నిర్వహించారు. ఈ సందర్భంగా 200 కిలోల భారీ కేక్‌ను చిన్నారులతో కలిసి కట్ చేసి, 350 మంది చిన్నారులకు సైకిళ్లను పంపిణీ చేశారు. అనంతరం మాట్లాడుతూ కాంగ్రెస్ పార్టీ దేశ అభివృద్ధికి బీహెచ్ఈఎల్, బీడీఎల్, ఇక్రిశాట్, ఐఐటీ హైదరాబాద్ వంటి అనేక కీలక సంస్థలను అందించిందని, కానీ ప్రస్తుతం బీజేపీ ప్రభుత్వం కేంద్ర రంగ సంస్థలను ప్రైవేటీకరణ చేస్తోందని విమర్శించారు. నెహ్రూ కుటుంబం దేశానికి చేసిన సేవలను గుర్తు చేస్తూ, గత 12 ఏళ్ల మోదీ పాలనలో దేశానికి జరిగిన ప్రయోజనాలపై బీజేపీ నేతలు సమాధానం చెప్పాలని సవాల్ విసిరారు. ప్రతి ఏడాది రెండు కోట్ల ఉద్యోగాలు ఇస్తామని చెప్పి యువత ఆశలను కేంద్ర ప్రభుత్వం నెరవేర్చలేదని అన్నారు. రాహుల్ గాంధీ దేశానికి అవసరమైన నాయకుడని, భవిష్యత్తులో ఆయన దేశ ప్రధాని కావాలని ఆకాంక్షించారు. ఈ కార్యక్రమంలో కాంగ్రెస్ నాయకులు, కార్యకర్తలు, చిన్నారులు, ప్రజలు పెద్ద సంఖ్యలో పాల్గొని రాహుల్ గాంధీకి జన్మదిన శుభాకాంక్షలు తెలిపారు.