గర్భిణీలు, బాలింతలు, చిన్నారుల తల్లులు పోషకాహారంపై ప్రత్యేక శ్రద్ధ చూపాలని ఏడబ్ల్యూఎస్‌ సూపర్‌వైజర్‌ సుజాత సూచించారు. పోషణ మాసం సందర్భంగా నిదానపల్లి గ్రామంలోని అంగన్‌వాడీ కేంద్రంలో మంగళవారం అవగాహన కార్యక్రమం నిర్వహించారు. కార్యక్రమానికి గ్రామ సర్పంచ్‌ నారపాక మాధవి యాదయ్య ముఖ్యఅతిథిగా హాజరయ్యారు.ఈ సందర్భంగా సుజాత మాట్లాడుతూ.. రోజువారీ ఆహారంలో ఆకుకూరలు, పప్పులు, కూరగాయలు, పండ్లు, గుడ్లు, చిరుధాన్యాలు వంటి పోషక విలువలు కలిగిన ఆహారాన్ని చేర్చుకోవాలని సూచించారు. సమతుల ఆహారం తీసుకోవడం ద్వారా తల్లి, గర్భంలోని శిశువు ఆరోగ్యంగా ఎదగడానికి దోహదపడుతుందన్నారు.

రక్తహీనతపై అప్రమత్తత అవసరం

మహిళల్లో రక్తహీనతను నివారించేందుకు ఐరన్‌, ఫోలిక్‌ యాసిడ్‌ సమృద్ధిగా లభించే ఆహారం తీసుకోవాలని సుజాత తెలిపారు. వైద్యుల సూచన మేరకు ఐరన్‌–ఫోలిక్‌ యాసిడ్‌ మాత్రలను క్రమం తప్పకుండా వాడడంతో పాటు అవసరమైన ఆరోగ్య పరీక్షలు చేయించుకోవాలని సూచించారు. అలసట, నీరసం వంటి లక్షణాలను నిర్లక్ష్యం చేయకుండా వైద్యులను సంప్రదించాలన్నారు.

గర్భిణీలు క్రమం తప్పకుండా వైద్య పరీక్షలు చేయించుకోవాలని, బాలింతలు ప్రసవానంతరం తమ ఆరోగ్యంతో పాటు శిశువుకు తగిన పోషకాహారం అందించడంపై శ్రద్ధ వహించాలని పేర్కొన్నారు. చిన్నారులకు తల్లిపాలు, వయసుకు అనుగుణంగా అదనపు పోషకాహారం అందించడం ముఖ్యమన్నారు. పోషకాహారాన్ని నిత్య జీవితంలో ఒక అలవాటుగా మార్చుకోవాలని, పోషణ మాసం సందర్భంగా నిర్వహిస్తున్న అవగాహన కార్యక్రమాలను సద్వినియోగం చేసుకోవాలని సూచించారు.కార్యక్రమంలో అంగన్‌వాడీ టీచర్‌ బబ్బూరి నాగమ్మ, వార్డు సభ్యులు వంగాల పూజిత, భాషమల్ల అనిత, ఏఎన్‌ఎం ఆదిలక్ష్మి, వీఓ కడారి ఇందిరా తదితరులు పాల్గొన్నారు. అనంతరం చిన్నారులకు అన్నప్రాసన కార్యక్రమం నిర్వహించారు.