చిన్నకాపర్తి గ్రామంలో మొక్కల పంపిణీ కార్యక్రమంపై ఆక్షేపణ.

చిట్యాల మండలంలోని చిన్నకాపర్తి గ్రామ పంచాయతీలో నిర్వహించిన మొక్కల పంపిణీ కార్యక్రమంలో ప్రోటోకాల్ ఉల్లంఘన జరిగిందని ఆరోపిస్తూ గ్రామ ఉప సర్పంచ్, వార్డు సభ్యురాలు బెల్లంకొండ లావణ్య ఎంపీడీవోకు లిఖితపూర్వక ఫిర్యాదు చేశారు.శనివారం ఎంపీడీవోకు అందజేసిన ఫిర్యాదు లేఖలో ఆమె పలు అంశాలను ప్రస్తావించారు. తన వార్డు పరిధిలో నిర్వహించిన ప్రభుత్వ కార్యక్రమానికి స్థానిక ప్రజాప్రతినిధిగా ఎలాంటి ముందస్తు సమాచారం ఇవ్వలేదని, ఉప సర్పంచ్ హోదాలో ఉన్న తనను పూర్తిగా పక్కనపెట్టి మొక్కల పంపిణీ కార్యక్రమాన్ని నిర్వహించారని పేర్కొన్నారు.

గ్రామ ప్రజల చేత ఎన్నికైన ప్రజాప్రతినిధులకు సమాచారం ఇవ్వకుండా ప్రభుత్వ కార్యక్రమాలు నిర్వహించడం ప్రజాస్వామ్య స్ఫూర్తికి విరుద్ధమని ఆమె ఆవేదన వ్యక్తం చేశారు. గ్రామ పంచాయతీ వ్యవహారాల్లో ప్రజాప్రతినిధుల గౌరవాన్ని కాపాడాల్సిన బాధ్యత అధికారులపై ఉందని, భవిష్యత్తులో ఇటువంటి ఘటనలు పునరావృతం కాకుండా తగిన చర్యలు తీసుకోవాలని కోరారు.

ఈ ఘటనపై విచారణ జరిపి బాధ్యులపై చర్యలు తీసుకోవడంతో పాటు, ఇకపై గ్రామ పంచాయతీ పరిధిలో నిర్వహించే ప్రభుత్వ కార్యక్రమాలన్నింటికీ సంబంధిత ప్రజాప్రతినిధులకు ముందస్తు సమాచారం అందేలా ఆదేశాలు జారీ చేయాలని ఎంపీడీవోను ఆమె విజ్ఞప్తి చేశారు.