యాదాద్రి భువనగిరి జిల్లా రామన్నపేట మండలం పల్లివాడ గ్రామానికి చెందిన బాదే జోసఫ్ ప్రిన్స్ ప్రపంచ గిన్నిస్ రికార్డు సాధించి గ్రామానికి, జిల్లాకు గర్వకారణంగా నిలిచాడు.

హైదరాబాద్‌లోని గచ్చిబౌలి ఆడిటోరియంలో హల్లెల్ మ్యూజిక్ స్కూల్ ఆధ్వర్యంలో నిర్వహించిన “గిన్నిస్ అచీవర్స్ మీట్” కార్యక్రమంలో ప్రపంచంలోని 22 దేశాలకు చెందిన సుమారు 2,000 మంది కీబోర్డ్ వాయిద్యకారులు పాల్గొన్నారు. గంటల తరబడి నిరంతరాయంగా కీబోర్డ్ వాయిస్తూ తమ ప్రతిభను ప్రదర్శించిన వారిలో ఎంపికైన 777 మంది విద్యార్థులకు వరల్డ్ రికార్డు సర్టిఫికెట్లు ప్రదానం చేశారు.

ఈ సందర్భంగా హల్లెల్ మ్యూజిక్ స్కూల్ చైర్మన్ అగస్టీన్ దాదంగి జోసఫ్ ప్రిన్స్‌కు స్వయంగా సర్టిఫికెట్ అందజేసి అభినందించారు.

జోసఫ్ ప్రిన్స్ సాధించిన విజయంపై లైఫ్ ఎడిఫైర్స్ చర్చి వ్యవస్థాపకులు జోనాతన్, సంఘ సభ్యులు, తల్లిదండ్రులు బాదే విజయ్–లీల హర్షం వ్యక్తం చేశారు. కుటుంబ పెద్దలు బాదే శ్రీనివాస్, ధనమ్మ, అక్క బాదే దీక్షిత, అన్న బాదే అజయ్ కుమార్ అభినందనలు తెలిపారు.

లండన్ నుంచి వచ్చిన అక్క దీక్షిత తన తమ్ముడు పోటీల్లో ప్రదర్శించిన ప్రతిభను ప్రత్యక్షంగా వీక్షించి ఆనందం వ్యక్తం చేస్తూ, భవిష్యత్తులో మరిన్ని ప్రపంచ రికార్డులు సాధించాలని ఆకాంక్షించారు.

ఈ సందర్భంగా జోసఫ్ ప్రిన్స్ మాట్లాడుతూ, తన తల్లిదండ్రులు, సంఘ కాపరి జోనాతన్ చిన్నప్పటి నుంచే సంగీతంపై ఆసక్తి పెంచి ప్రోత్సహించారని, వారి సహకారంతోనే ఈ ఘనత సాధించగలిగానని తెలిపారు