ప్రాణాలు కాపాడుతున్నా.. బతుకులు భారమే!

చాలీచాలని వేతనాలతో 108 సిబ్బంది ఆవేదన

వేతనాల పెంపు కోరుతూ యాజమాన్యానికి విజ్ఞప్తి

ప్రజలకు ఆపద సమయంలో అండగా నిలిచి ప్రాణాలు కాపాడుతున్న 108 అంబులెన్స్ సిబ్బంది తమ కుటుంబాల పోషణ మాత్రం భారంగా మారిందని ఆవేదన వ్యక్తం చేస్తున్నారు. అహర్నిశలు విధులు నిర్వహిస్తూ అత్యవసర సేవలు అందిస్తున్నప్పటికీ, అందుతున్న వేతనాలు ప్రస్తుత పరిస్థితులకు ఏమాత్రం సరిపోవడం లేదని వాపోతున్నారు.

నిత్యావసర వస్తువుల ధరలు, గ్యాస్, విద్య, వైద్య ఖర్చులు రోజురోజుకూ పెరుగుతుండటంతో నెలాఖరు వరకు జీతం సరిపోవడం లేదని సిబ్బంది చెబుతున్నారు. ముఖ్యంగా పాఠశాలలు ప్రారంభమైన నేపథ్యంలో పిల్లల ఫీజులు, పుస్తకాలు, యూనిఫాంలు, బ్యాగుల కొనుగోలు భారంగా మారిందని ఆవేదన వ్యక్తం చేస్తున్నారు. కుటుంబ అవసరాలు తీర్చడానికే అప్పులు చేయాల్సిన పరిస్థితి నెలకొందని పేర్కొంటున్నారు.

ప్రజల ప్రాణాలను కాపాడేందుకు వర్షం, ఎండ, రాత్రింబవళ్లు అనే తేడా లేకుండా సేవలందిస్తున్న తమ సమస్యలను యాజమాన్యం గుర్తించాలని కోరుతున్నారు. పెరుగుతున్న జీవన వ్యయానికి అనుగుణంగా వేతనాలను సవరించి, గౌరవప్రదమైన జీవనం సాగించేలా చర్యలు తీసుకోవాలని జీవీకే (GVK) యాజమాన్యాన్ని, ప్రభుత్వాన్ని విజ్ఞప్తి చేశారు.

"ప్రాణాలను కాపాడే చేతులకు.. జీవన భరోసా కల్పించండి" అంటూ 108 అంబులెన్స్ సిబ్బంది తమ ఆవేదనను వ్యక్తం చేశారు.