రామన్నపేట: ప్రధాన ఎన్నికల కమిషనర్‌ జ్ఞానేశ్‌ కుమార్‌ తక్షణమే పదవికి రాజీనామా చేయాలని డిమాండ్‌ చేస్తూ ఆల్‌ ఇండియా లాయర్స్‌ యూనియన్‌ (AILU) ఆధ్వర్యంలో శనివారం రామన్నపేట కోర్టు ఎదుట నిరసన చేపట్టారు.

ఈ సందర్భంగా AILU తెలంగాణ రాష్ట్ర కమిటీ ఉపాధ్యక్షుడు మామిడి వెంకట్‌ మాట్లాడుతూ.. ఎన్నికల కమిషనర్‌ వ్యవహారశైలి ప్రజాస్వామ్య స్ఫూర్తికి విరుద్ధంగా ఉందని విమర్శించారు. ఇతర ఎన్నికల కమిషనర్ల భిన్నాభిప్రాయాలను పరిగణనలోకి తీసుకోకుండా నిర్ణయాలు తీసుకోవడం పట్ల ఆందోళన వ్యక్తం చేశారు. ఎన్నికల వ్యవస్థపై ప్రజల్లో విశ్వాసాన్ని కాపాడేందుకు ప్రధాన ఎన్నికల కమిషనర్‌ స్వతంత్రంగా, నిష్పాక్షికంగా వ్యవహరించాల్సిన అవసరం ఉందన్నారు.

భారత రాజ్యాంగం కల్పించిన సార్వత్రిక వయోజన ఓటు హక్కును, ప్రజాస్వామ్య స్ఫూర్తిని పరిరక్షించడం ప్రతి ఒక్కరి బాధ్యత అన్నారు. జ్ఞానేశ్‌ కుమార్‌ రాజీనామా చేయాలని, లేనిపక్షంలో రాజ్యాంగబద్ధమైన పార్లమెంటరీ ప్రక్రియ ద్వారా ఆయనను తొలగించాలని డిమాండ్‌ చేశారు. ఈ డిమాండ్‌తో జరుగుతున్న ప్రజా ఆందోళనలకు AILU సంఘీభావం ప్రకటిస్తుందని తెలిపారు.

కార్యక్రమంలో AILU జిల్లా కమిటీ సభ్యులు ఎండీ ఖయ్యూం, గడ్డం నరసింహ, శ్రీకాంత్‌, శ్రీశైలం, తాటిపాముల కిరణ్‌ తదితరులు పాల్గొన్నారు.