పెద్ద సంఖ్యలో పాల్గొని విజయవంతం చేయాలి

రామన్నపేట: న్యాయవాదుల సంక్షేమానికి సంబంధించిన ప్రధాన డిమాండ్ల సాధన కోసం బుధవారం రాష్ట్రవ్యాప్తంగా అన్ని కోర్టు కాంప్లెక్స్‌ల ఎదుట నిర్వహించనున్న ధర్నాలో న్యాయవాదులు పెద్ద సంఖ్యలో పాల్గొని విజయవంతం చేయాలని ఆల్‌ ఇండియా లాయర్స్‌ యూనియన్‌ (ఐలు) రాష్ట్ర ఉపాధ్యక్షుడు మామిడి వెంకట్‌రెడ్డి పిలుపునిచ్చారు. మంగళవారం రామన్నపేటలో నిర్వహించిన ఐలు సమావేశంలో ఆయన మాట్లాడారు.

ఐలు జాతీయ కౌన్సిల్‌ నిర్ణయం మేరకు ఈ రాష్ట్రవ్యాప్త ఆందోళన చేపడుతున్నట్లు తెలిపారు. న్యాయవాదుల సంక్షేమానికి కేంద్ర, రాష్ట్ర ప్రభుత్వాలు తగిన ప్రాధాన్యం ఇవ్వాలని కోరారు. కేంద్ర న్యాయవాదుల సంక్షేమ నిధి చట్టం–2001ను సవరించి న్యాయవాది మరణం లేదా పదవీ విరమణ సమయంలో రూ.25 లక్షలు అందించాలని, వైద్య సహాయంగా రూ.5 లక్షలు మంజూరు చేయాలని డిమాండ్‌ చేశారు. జూనియర్‌ న్యాయవాదులకు కనీసం ఐదేళ్లపాటు నెలకు రూ.10 వేల స్టైపెండ్‌ ఇవ్వాలని కోరారు.

డిమాండ్ల సాధన కోసం నిర్వహించే ధర్నాను విజయవంతం చేసేందుకు న్యాయవాదులు ఐక్యంగా పాల్గొనాలని వెంకట్‌రెడ్డి కోరారు. సమావేశానికి ఐలు జిల్లా ఉపాధ్యక్షుడు పాల్వంచ జగతయ్య అధ్యక్షత వహించారు. జిల్లా నాయకులు యాదాసు యాదయ్య, గడ్డం నరసయ్య, అంకం నరేష్, కిరణ్‌కుమార్, జితేందర్ తదితరులు పాల్గొన్నారు.