నల్లగొండ, జూలై 27:

నల్లగొండ పట్టణంలో సంచలనం రేపే ఘటన వెలుగులోకి వచ్చింది. జిల్లా కలెక్టర్ కార్యాలయానికి సమీపంలోని శివగంగా ప్రాంతంలో ఉన్న ఓ పాత ఇనుప సామాను దుకాణంలో తెలంగాణ ఎన్నికల సంఘానికి చెందినట్లు కనిపిస్తున్న బ్యాలెట్ బాక్స్ లభ్యమవడం పలు అనుమానాలకు తావిస్తోంది.సాధారణంగా ఎన్నికల నిర్వహణలో ఉపయోగించే బ్యాలెట్ బాక్సులను ఎన్నికలు పూర్తైన తర్వాత సంబంధిత అధికారుల పర్యవేక్షణలో స్ట్రాంగ్ రూమ్‌లలో భద్రపరుస్తారు. అలాంటి బ్యాలెట్ బాక్స్ స్క్రాప్ షాపులో కనిపించడం చర్చనీయాంశంగా మారింది.బ్యాలెట్ బాక్స్‌పై ఉన్న వివరాలను పరిశీలిస్తే అది జయశంకర్ భూపాలపల్లి జిల్లాకు చెందినదిగా కనిపిస్తున్నట్లు సమాచారం. దీంతో ఆ బాక్స్ స్ట్రాంగ్ రూమ్ నుంచి బయటకు ఎలా వచ్చింది? ఎన్నికల సంఘం అధికారికంగా వేలం వేసిందా? లేక మరే ఇతర మార్గంలో స్క్రాప్ దుకాణానికి చేరిందా? అనే ప్రశ్నలు ఉత్పన్నమవుతున్నాయి.

మరోవైపు, బాక్స్‌పై కట్టర్‌తో కోసిన ఆనవాళ్లు కనిపించడం మరిన్ని అనుమానాలకు దారితీస్తోంది. దుకాణ యజమానిని ప్రశ్నించగా, మూడు రోజుల క్రితం గుర్తు తెలియని వ్యక్తి ఈ బాక్స్‌ను తమకు విక్రయించినట్లు తెలిపినట్లు సమాచారం.

ఈ ఘటనతో ఇలాంటి బ్యాలెట్ బాక్సులు మరెక్కడైనా బయటకు వచ్చాయా అనే సందేహాలు కూడా వ్యక్తమవుతున్నాయి. దీనిపై ఎన్నికల అధికారులు, జిల్లా యంత్రాంగం సమగ్ర విచారణ చేపట్టి వాస్తవాలను వెలికితీయాలని ప్రజలు కోరుతున్నారు. బ్యాలెట్ బాక్స్ స్క్రాప్ దుకాణానికి చేరిన తీరుపై బాధ్యులను గుర్తించి తగిన చర్యలు తీసుకోవాలని డిమాండ్‌లు వినిపిస్తున్నాయి.