నల్లగొండ పట్టణ కేంద్రంలోని గొల్లగూడ ప్రాథమిక వ్యవసాయ సహకార సంఘం (PACS) చైర్మన్‌గా ఆలకుంట్ల నాగరత్నం రాజు సోమవారం బాధ్యతలు స్వీకరించారు. ప్రభుత్వ ఆదేశాల మేరకు ఆయన పదవిలోకి ప్రవేశించారు.

ఈ సందర్భంగా నాగరత్నం రాజు మాట్లాడుతూ, గొల్లగూడ PACS ద్వారా రైతులకు ఎలాంటి ఇబ్బందులు లేకుండా ధాన్యం కొనుగోళ్లు నిర్వహించడంతో పాటు, సకాలంలో రుణాలు అందించేందుకు కృషి చేస్తానని తెలిపారు. రైతులకు సేవ చేయడం ఎంతో అదృష్టంగా భావిస్తున్నానని, వారి సంక్షేమమే తన ప్రధాన లక్ష్యమని పేర్కొన్నారు.

రాష్ట్ర రోడ్లు, భవనాలు మరియు సినిమాటోగ్రఫీ శాఖ మంత్రి కోమటిరెడ్డి వెంకటరెడ్డి సహకారంతో రైతులకు మెరుగైన సేవలు అందించేందుకు కట్టుబడి ఉంటామని ఆయన అన్నారు. అలాగే, సొసైటీ అభివృద్ధికి కృషి చేసి, రాష్ట్రంలోనే ముందంజలో నిలిపేలా ప్రయత్నిస్తామని స్పష్టం చేశారు.

ఈ కార్యక్రమంలో కార్యాలయ అధికారులు, సిబ్బంది, అభిమానులు చైర్మన్‌ను పూలమాలలు, బోకేలు, శాలువాలతో సన్మానించారు.

కాగా, PACS చైర్మన్ల పదవీకాలం గతంలో ముగిసిన నేపథ్యంలో, ప్రభుత్వం మరోసారి వారి పదవీకాలాన్ని పొడిగిస్తూ ఉత్తర్వులు జారీ చేసింది.