నల్గొండను 'స్మార్ట్ సిటీ'గా తీర్చిదిద్దుతాం...

​బెస్ట్ కార్పొరేషన్ అవార్డు అందుకోవడమే లక్ష్యం...

​రూ.83 కోట్లతో నిరంతర తాగునీటి సరఫరా పనులు...

రూ.1.01 కోట్లతో స్వీపింగ్ యంత్రాలు ప్రారంభించిన మంత్రి కోమటిరెడ్డి వెంకటరెడ్డి...

​నల్గొండ : నల్గొండ మున్సిపల్ కార్పొరేషన్‌లో ప్రజలకు అన్ని రకాల ప్రాథమిక వసతులు కల్పించి 'స్మార్ట్ సిటీ'గా తీర్చిదిద్దడమే కాకుండా, రాష్ట్రంలోనే బెస్ట్ కార్పొరేషన్ అవార్డు సాధించేలా అభివృద్ధి చేస్తామని రోడ్లు, భవనాలు, సినిమాటోగ్రఫీ శాఖల మంత్రి కోమటిరెడ్డి వెంకటరెడ్డి స్పష్టం చేశారు. మంగళవారం నల్గొండ జిల్లా కేంద్రంలోని ఇందిరాభవన్ (మంత్రి క్యాంపు కార్యాలయం) ప్రాంగణంలో కార్పొరేషన్ పరిధిలో పరిశుభ్రత కోసం రూ.1.01 కోట్ల వ్యయంతో నూతనంగా కొనుగోలు చేసిన రెండు స్వీపింగ్ (వెట్టింగ్) యంత్రాలను ఆయన జెండా ఊపి ప్రారంభించారు. ఈ సందర్భంగా ఏర్పాటు చేసిన మీడియా సమావేశంలో మంత్రి మాట్లాడుతూ వివరాలు వెల్లడించారు.. నూతనంగా ఏర్పాటైన నల్గొండ కార్పొరేషన్ ప్రజలకు 24 గంటల పాటు మంచినీటిని అందించడమే లక్ష్యంగా రూ.83 కోట్లతో టెండర్లు పిలిచినట్లు తెలిపారు.

రూ.900 కోట్లతో ఓఆర్ఆర్...

పట్టణ మౌలిక వసతుల విస్తరణలో భాగంగా రూ.900 కోట్ల అంచనా వ్యయంతో ఔటర్ రింగ్ రోడ్డు (ఓఆర్ఆర్) నిర్మాణం చేపడుతున్నామని వివరించారు. ఎస్‌డీఎఫ్ నిధులతో ఇప్పటికే కార్పొరేషన్ పరిధిలో 63 కిలోమీటర్ల మేర సీసీ రోడ్ల నిర్మాణం పూర్తయిందని, మిగతా డివిజన్లలో కూడా త్వరలోనే రోడ్లు, డ్రెయిన్ల పనులు పూర్తి చేస్తామన్నారు. నగరంలో మురుగునీటి శుద్ధి ప్లాంట్ (ఎస్టీపీ) పనులను రాబోయే ఆరు నెలల్లో పూర్తి చేయాలని లక్ష్యంగా పెట్టుకున్నట్లు పేర్కొన్నారు. ఇటీవల నల్గొండ కార్పొరేషన్ 'స్వచ్ఛ అవార్డు' దక్కించుకోవడం అభినందనీయమని, మున్ముందు అవసరమైన నిధులన్నీ తీసుకువచ్చి కార్పొరేషన్‌ను మరింత ఉన్నతంగా తీర్చిదిద్దుతామని విశ్వాసం వ్యక్తం చేశారు. ఈ కార్యక్రమంలో జిల్లా కలెక్టర్ బి. చంద్రశేఖర్, నల్గొండ మేయర్ బుర్రి చైతన్య శ్రీనివాస్ రెడ్డి, డిప్యూటీ మేయర్ అమీర్ అలీ, మాజీ మున్సిపల్ చైర్మన్ బుర్రి శ్రీనివాస్ రెడ్డి, మున్సిపల్ కమిషనర్ వంశీకృష్ణతో పాటు ఆర్అండ్‌బీ అధికారులు, ఇతర ప్రజాప్రతినిధులు పాల్గొన్నారు.