నల్గొండ: పట్టణంలోని గంధంవారిగూడెంలో గురువారం రాత్రి దారుణ హత్య చోటుచేసుకుంది. బంటు వెంకటేష్‌ అనే వ్యక్తిపై గుర్తుతెలియని వ్యక్తులు రాళ్లతో దాడి చేయడంతో మృతిచెందినట్లు సమాచారం.

రాత్రి 9 నుంచి 9.30 గంటల మధ్య ముగ్గురు పురుషులు, ఇద్దరు మహిళలు వెంకటేష్‌పై దాడికి పాల్పడినట్లు స్థానికులు చెబుతున్నారు. ముందుగా ఆయన కళ్లలో కారం చల్లి.. అనంతరం రాళ్లు, బండరాళ్లతో దాడి చేసినట్లు సమాచారం. తీవ్రంగా గాయపడిన వెంకటేష్‌ అక్కడికక్కడే మృతిచెందినట్లు తెలుస్తోంది.

మృతుడికి భార్యతో కొంతకాలంగా గొడవలు ఉన్నట్లు సమాచారం. ఈ దాడిలో ఆమె కూడా పాల్గొన్నట్లు వెంకటేష్‌ కుటుంబ సభ్యులు ఆరోపిస్తున్నారు. అయితే దీనిపై పోలీసుల నుంచి అధికారిక ధ్రువీకరణ రావాల్సి ఉంది.

సమాచారం అందుకున్న పోలీసులు ఘటనా స్థలానికి చేరుకుని వివరాలు సేకరించారు. హత్యకు కుటుంబ వివాదాలా.. పాత కక్షలా.. మరేదైనా కారణమా అనే కోణంలో దర్యాప్తు చేస్తున్నారు. నిందితుల వివరాలు, హత్యకు అసలు కారణం పోలీసుల విచారణలో తేలాల్సి ఉంది.