జహీరాబాద్ నియోజకవర్గంలోని ఝరాసంఘం మండల కేంద్ర పోలీస్ స్టేషన్‌లో తెలంగాణ రాష్ట్ర ఆవిర్భావ దినోత్సవ వేడుకలను ఘనంగా నిర్వహించారు. ఈ సందర్భంగా స్థానిక ఎస్సై క్రాంతి కుమార్ జాతీయ జెండాను ఆవిష్కరించి జెండాకు వందనం చేశారు. తెలంగాణ రాష్ట్ర సాధన కోసం పోరాడి ప్రాణత్యాగాలు చేసిన అమరవీరులను స్మరించుకుంటూ వారి సేవలను కొనియాడారు. తెలంగాణ రాష్ట్ర ఏర్పాటు ప్రజల దీర్ఘకాల ఆకాంక్షల ఫలితమని, రాష్ట్ర అభివృద్ధి మరియు ప్రజల సంక్షేమం కోసం ప్రతి ఒక్కరూ తమ బాధ్యతలను సమర్థవంతంగా నిర్వర్తించాలని ఆయన సూచించారు. ఈ కార్యక్రమంలో ఎస్సై నారాయణతో పాటు పోలీస్ అధికారులు, సిబ్బంది పాల్గొని జాతీయ జెండాకు సెల్యూట్ చేశారు. దేశభక్తి, తెలంగాణ ఆత్మగౌరవం, ప్రజాసేవా స్ఫూర్తిని ప్రతిబింబించేలా కార్యక్రమం ఉత్సాహభరితంగా నిర్వహించబడింది.