హైదరాబాద్,

తెలంగాణ రాష్ట్ర ప్రభుత్వ జీఓ ఎంఎస్ నం.252 ప్రకారం రాష్ట్రంలోని అర్హులైన జర్నలిస్టులకు మీడియా అక్రిడిటేషన్ కార్డులు జారీ చేయనున్నట్లు తెలంగాణ సమాచార & ప్రజా సంబంధాల శాఖ ప్రత్యేక కమిషనర్ సి.హెచ్. ప్రియాంక తెలిపారు.

ప్రింట్, ఎలక్ట్రానిక్, డిజిటల్, ఫ్రీలాన్స్ మరియు అనుభవజ్ఞులైన జర్నలిస్టులు ఈ నెల 9వ తేదీ నుండి అధికారిక పోర్టల్ ipr.telangana.gov.in ద్వారా ఆన్‌లైన్‌లో దరఖాస్తు చేసుకోవచ్చని ఆమె వెల్లడించారు. దరఖాస్తుల స్వీకరణ, కార్డుల జారీ ప్రక్రియ రోలింగ్ ప్రాతిపదికన కొనసాగుతుందని పేర్కొన్నారు.

దరఖాస్తు సమయంలో సాంకేతిక సమస్యలు ఎదురైన పక్షంలో కార్యాలయ వేళల్లో (ఉదయం 10:30 నుంచి సాయంత్రం 5:00 వరకు) 9154170881 నంబర్‌లో మీడియా రిలేషన్స్ వింగ్‌ను సంప్రదించాలని సూచించారు.

రాష్ట్రంలోని జర్నలిస్టులు ఈ అవకాశాన్ని వినియోగించుకోవాలని ఆమె కోరారు.