గ్రామాల్లో అక్రమంగా కొనసాగుతున్న బెల్టు షాపులను నిర్వాహకులు స్వచ్ఛందంగా మూసివేయాలని పీపల్ పహాడ్ ఉపసర్పంచ్ బకనగారి శ్రవణ్ గౌడ్ పిలుపునిచ్చారు. మంగళవారం ఆయన విలేకరులతో మాట్లాడుతూ.. గ్రామాల్లో బెల్టు షాపుల నిర్వహణ వల్ల నిరుపేద కుటుంబాలు రోడ్డున పడుతున్నాయని ఆవేదన వ్యక్తం చేశారు.

కుటుంబాలు విచ్ఛిన్నం.. యువత పెడదోవ..

ఇంటి ముందే మద్యం సులువుగా దొరుకుతుండటంతో రెక్కాడితే గాని డొక్కాడని నిరుపేదలు మద్యానికి బానిసలవుతున్నారని, ఫలితంగా ఎన్నో కుటుంబాలు విచ్ఛిన్నమవుతున్నాయని శ్రవణ్ గౌడ్ పేర్కొన్నారు. ఇప్పటికే గ్రామంలోని యువత మద్యం మత్తుకు అలవాటు పడుతోందని.. బెల్టు షాపులను తక్షణమే నివారించకపోతే భవిష్యత్తు తరాలు పూర్తిగా నాశనమయ్యే ప్రమాదం ఉందని హెచ్చరించారు.​"గ్రామాల్లో శాంతిభద్రతలకు విఘాతం కలిగిస్తూ, నిరుపేదల జీవితాలతో ఆడుకుంటున్న బెల్టు షాపులను వెంటనే అరికట్టాలి. యువత భవిష్యత్తును దృష్టిలో ఉంచుకుని నిర్వాహకులు స్వచ్ఛందంగా వీటిని మూసివేయాలి."​గ్రామాల్లో అక్రమ మద్యం విక్రయాలపై అధికారులు కూడా దృష్టి సారించి, కఠిన చర్యలు తీసుకోవాలని ఆయన ఈ సందర్భంగా డిమాండ్ చేశారు.