*రూ. 70 వేల విలువైన బ్యూటీషియన్ కిట్ అందజేత

ఆర్థిక ఇబ్బందుల్లో ఉన్న ఓ నిరుపేద కుటుంబానికి ఈఎల్వీ ఫౌండేషన్ మానవత్వంతో అండగా నిలిచింది. చౌటుప్పల్ పరిధిలోని ఎల్లగిరి గ్రామానికి చెందిన పోలేపల్లి అనిత భర్తకు దూరమై గత 11 ఏళ్లుగా ముగ్గురు ఆడపిల్లలను ఒంటరిగానే పోషిస్తోంది. తల్లి పడుతున్న కష్టాన్ని చూసి చలించిన పెద్ద కుమార్తె లోకేశ్వరి.. కుటుంబానికి భారం కాకూడదని, తన కాళ్లపై తాను నిలబడాలని నిర్ణయించుకుంది. బాబాయ్, అన్నల సహకారంతో బ్యూటీషియన్ కోర్సు పూర్తి చేసింది. సొంతంగా ఉపాధి ప్రారంభించడానికి అవసరమైన సుమారు రూ. 70,000 విలువైన మేకప్ కిట్ కొనుగోలు చేయడం ఆమెకు భారంగా మారింది. ఈ విషయాన్ని స్థానికులు ఈఎల్వీ ఫౌండేషన్ ఛైర్మన్ ఈఎల్వీ భాస్కర్ దృష్టికి తీసుకెళ్లగా, ఆయన సానుకూలంగా స్పందించారు. లోకేశ్వరి స్వయం ఉపాధికి తోడ్పాటునందిస్తూ రూ. 70 వేల విలువైన మేకప్ కిట్‌ను శనివారం తన చేతుల మీదుగా అందజేశారు. ఈ సందర్భంగా భాస్కర్ మాట్లాడుతూ.. నిరుపేద యువతులు స్వయంశక్తితో ఎదగడానికి తమ ఫౌండేషన్ ఎల్లప్పుడూ తోడ్పాటునందిస్తుందని అన్నారు. ఫౌండేషన్ సాయంపై లోకేశ్వరి కుటుంబ సభ్యులు కృతజ్ఞతలు తెలిపారు. ఈ కార్యక్రమంలో ఈఎల్వీ ఫౌండేషన్ డైరెక్టర్ ఈఎల్వీ అశోక్, ధీరజ్, వార్డు మెంబర్ బాలగోని శివశంకర్, మహ్మద్ ఇబ్రహీం, జెర్రిపోతుల వెంకటేష్, పోలేపల్లి లాలయ్య, శివరాంరాజ్ తదితరులు పాల్గొన్నారు.