తిరుమలగిరి; ఎస్సీ కమిషన్ చైర్మన్, సభ్యుల నియామకాల్లో రొటేషన్ పద్ధతిని అవలంబించి మాదిగ, ఉపకులాలకు చెందిన అర్హులైన జర్నలిస్టులకు అవకాశం కల్పించాలని తెలంగాణ మాదిగ జర్నలిస్టు ఫోరం (టీఎంజేఎఫ్) డిమాండ్ చేసింది. ఈ మేరకు శుక్రవారం తిరుమలగిరిలోని తుంగతుర్తి ఎమ్మెల్యే మందుల సామేల్ క్యాంపు కార్యాలయంలో ఆయనకు వినతిపత్రం అందజేశారు.

ఈ సందర్భంగా టీఎంజేఎఫ్ నాయకులు మాట్లాడుతూ రాష్ట్ర ఎస్సీ, ఎస్టీ కమిషన్ పదవీకాలం ముగిసిన నేపథ్యంలో త్వరలో చేపట్టనున్న నూతన నియామకాల్లో జర్నలిస్టు రంగానికి చెందిన అర్హులకు చైర్మన్, సభ్యులుగా అవకాశం కల్పించాలని కోరారు. ఇప్పటివరకు రాజకీయ కోణంలో జరిగిన ఎంపికలకు భిన్నంగా రొటేషన్ పద్ధతిని అమలు చేసి వివిధ సామాజిక వర్గాలకు, ముఖ్యంగా మాదిగ, ఉపకులాల జర్నలిస్టులకు ప్రాతినిధ్యం కల్పించాలని విజ్ఞప్తి చేశారు.

ఈ అంశాన్ని ప్రజాప్రతినిధులు, ఎమ్మెల్యేలు, మంత్రుల దృష్టికి తీసుకెళ్లేందుకు రాష్ట్రవ్యాప్తంగా వినతిపత్రాల సమర్పణ కార్యక్రమాన్ని చేపట్టినట్లు తెలిపారు.

కార్యక్రమంలో టీఎంజేఎఫ్ రాష్ట్ర గౌరవ సలహాదారు జిలకర కృష్ణాకర్, రాష్ట్ర ఉపాధ్యక్షుడు కడియం నాగయ్య, రాష్ట్ర ప్రచార కార్యదర్శి చింత ప్రవీణ్ పాల్గొన్నారు.