​ క్షతగాత్రుడికి రూ. 10 వేల ఆర్థిక సాయం

ఆదర్శంగా నిలిచిన 1990-91 ఎస్ఎస్సీ బ్యాచ్ విద్యార్థులు

ఆపదలో ఉన్న చిన్ననాటి మిత్రుడిని ఆదుకునేందుకు మేమున్నామంటూ చౌటుప్పల్ ప్రభుత్వ పాఠశాల 1990-91 బ్యాచ్ పూర్వ విద్యార్థులు తమ ఉదారతను చాటుకున్నారు. తమతో పాటు కలిసి చదువుకున్న మిత్రుడు రామరాజు ఇటీవల రోడ్డు ప్రమాదానికి గురై తీవ్రంగా గాయపడ్డారు. ప్రస్తుతం ఆయన ఇంటి వద్దే ఉంటూ చికిత్స పొందుతున్నారు.ప్రమాదం కారణంగా రామరాజు ఆర్థిక పరిస్థితి ఇబ్బందికరంగా మారిన విషయాన్ని గుర్తించిన మిత్రులంతా ఒకటయ్యారు. తమ 'పెద్దబడి సోపతిగాల' సహాయ నిధి నుండి రూ. 10,000/- నగదును మిత్రుడికి ఆర్థిక సాయంగా అందజేశారు. గాయాల నుండి కోలుకుంటున్న రామరాజును పరామర్శించి, ధైర్యం చెప్పారు. చిన్ననాటి మిత్రులందరూ కలిసికట్టుగా ఇలాంటి సేవా కార్యక్రమాలు చేపట్టడం పట్ల స్థానికులు హర్షం వ్యక్తం చేస్తున్నారు. మిత్రుడికి అండగా నిలిచిన ప్రతి ఒక్కరికీ ఈ సందర్భంగా కృతజ్ఞతలు తెలిపారు.