ఎంక్వైరీల పేరుతో కాలయాపన చేయవద్దు.

కల్లుగీత కార్మిక సంఘం జిల్లా నాయకులు

కొండా వెంకన్న, చౌగాని సీతారాములు డిమాండ్

నల్గొండ: అర్హులైన గీత కార్మికులకు వెంటనే పెన్షన్లు మంజూరు చేయాలని, విచారణల పేరుతో కాలయాపన చేస్తూ కార్మికులను ఇబ్బందులకు గురిచేయవద్దని కల్లుగీత కార్మిక సంఘం నల్గొండ జిల్లా అధ్యక్షుడు కొండా వెంకన్న, ప్రధాన కార్యదర్శి చౌగాని సీతారాములు ప్రభుత్వాన్ని, సంబంధిత అధికారులను డిమాండ్ చేశారు.

కల్లుగీత వృత్తిపై ఆధారపడి జీవిస్తున్న కార్మికులు అనేక ఆర్థిక ఇబ్బందులను ఎదుర్కొంటున్నారని వారు పేర్కొన్నారు. ముఖ్యంగా వయస్సు పైబడిన గీత కార్మికులకు పెన్షన్ ఎంతో ఆసరాగా ఉంటుందని తెలిపారు. అర్హత ఉన్నప్పటికీ కొంతమందికి పెన్షన్లు మంజూరు కాకపోవడంతో వారు తీవ్ర ఇబ్బందులు పడుతున్నారని ఆవేదన వ్యక్తం చేశారు.

అర్హులైన గీత కార్మికుల దరఖాస్తులను పరిశీలించే పేరుతో పదేపదే విచారణలు నిర్వహిస్తూ పెన్షన్ల మంజూరులో జాప్యం చేయడం సరికాదన్నారు. అర్హతను నిర్ధారించే ప్రక్రియను త్వరితగతిన పూర్తి చేసి, పెండింగ్‌లో ఉన్న దరఖాస్తులను వెంటనే పరిష్కరించాలని కోరారు.

ప్రభుత్వం, సంబంధిత అధికారులు ఈ సమస్యపై తక్షణమే స్పందించి, అర్హులైన ప్రతి గీత కార్మికుడికి పెన్షన్ మంజూరు చేసి న్యాయం చేయాలని కొండా వెంకన్న, చౌగాని సీతారాములు డిమాండ్ చేశారు.