మహేశ్వరం నియోజకవర్గంలోని తుక్కుగూడ పరిసర ప్రాంత ప్రజలకు వోక్‌హార్డ్ ఫౌండేషన్ అందిస్తున్న ఉచిత మొబైల్ వైద్య సేవలు వరంగా మారాయి. హెచ్‌ఎఫ్‌సీఎల్ ప్రైవేట్ లిమిటెడ్ సహకారంతో గత 7–8 సంవత్సరాలుగా కొనసాగుతున్న ఈ సేవల ద్వారా సుమారు 25 గ్రామాలు, తాండాలకు చెందిన వేలాది మంది పేద, మధ్యతరగతి కుటుంబాలు లబ్ధి పొందుతున్నాయి.

మొబైల్ మెడికల్ యూనిట్ (ఎంఎంయూ) ద్వారా గ్రామాలకు నేరుగా చేరుకొని సాధారణ వైద్య పరీక్షలతో పాటు 40 నుంచి 50 రకాల ల్యాబ్ పరీక్షలను ఉచితంగా నిర్వహిస్తున్నారు. ఆరోగ్య సమస్యలను ప్రారంభ దశలోనే గుర్తించి అవసరమైన వైద్య సలహాలు అందించడంతో పాటు, అత్యవసర పరిస్థితుల్లో నిపుణులైన వైద్యులకు, ప్రముఖ ఆసుపత్రులకు రిఫర్ చేస్తున్నారు.

గ్రామీణ ప్రాంతాల్లో ఆరోగ్య సేవలను ప్రజల ఇంటి వద్దకే తీసుకెళ్లడం ద్వారా ఈ కార్యక్రమం విశేష ఆదరణ పొందుతోంది. ప్రజారోగ్య పరిరక్షణలో వోక్‌హార్డ్ ఫౌండేషన్ చేస్తున్న సేవలను గ్రామ ప్రజలు, సర్పంచులు, గ్రామ పెద్దలు ప్రశంసిస్తూ సంస్థ ప్రతినిధులకు కృతజ్ఞతలు తెలిపారు.

ఈ కార్యక్రమాల విజయవంతమైన నిర్వహణలో తెలంగాణ–ఆంధ్రప్రదేశ్ ఇన్‌చార్జ్ వినోద్ సారి కీలక పాత్ర పోషిస్తున్నారని స్థానికులు పేర్కొన్నారు. ఆయన సేవా దృక్పథం మరెంతో మందికి ఆదర్శంగా నిలవాలని ఆకాంక్షించారు.