భువనగిరి,: ప్రజాపాలన ప్రగతి ప్రణాళికలో భాగంగా జిల్లాలో ఈ నెల 18 నుంచి 23 వరకు యువజన వారోత్సవాలు నిర్వహించనున్నట్లు జిల్లా కలెక్టర్ అనురాగ్ జయంతి తెలిపారు. యువతలో క్రీడా స్ఫూర్తి, నాయకత్వ లక్షణాలు, నైపుణ్యాభివృద్ధి, ఉపాధి అవకాశాలపై అవగాహన పెంపొందించే లక్ష్యంతో వివిధ కార్యక్రమాలు చేపడుతున్నట్లు పేర్కొన్నారు.

18న “ఫిట్ అండ్ యాక్టివ్ తెలంగాణ” పేరుతో మండల స్థాయిలో మారథాన్ నిర్వహించనుండగా, జిల్లా స్థాయిలో భువనగిరి ప్రభుత్వ జూనియర్ కళాశాల నుంచి ఉదయం 6 గంటలకు రన్ కార్యక్రమం ప్రారంభం కానుంది. 19న భువనగిరి ఏటీసీలో కెరీర్ అండ్ స్కిల్ డెవలప్‌మెంట్ డే, 20న యాదగిరిగుట్ట ఎస్‌డీటీసీలో యువ నాయకత్వ సదస్సు, క్విజ్, పెయింటింగ్, సాంస్కృతిక కార్యక్రమాలు నిర్వహించనున్నారు.

21న భువనగిరి ఇండోర్ స్టేడియంలో క్రీడా పోటీలు, 22న భువనగిరి కోట వద్ద క్లీన్ తెలంగాణ కార్యక్రమం చేపట్టనున్నారు. 23న కలెక్టరేట్ ప్రధాన సమావేశ మందిరంలో ఉద్యోగ సాధన కార్యక్రమం నిర్వహించి అపాయింట్‌మెంట్ ఆర్డర్లు, సర్టిఫికెట్లు పంపిణీ చేయనున్నట్లు తెలిపారు.

ఈ కార్యక్రమాల్లో యువత, క్రీడాకారులు అధిక సంఖ్యలో పాల్గొని విజయవంతం చేయాలని కలెక్టర్ కోరారు.