సంక్రాంతి ట్రాఫిక్ రద్దీ నివారణకు ప్రత్యేక దారి మళ్లింపులు

హైదరాబాద్ వెళ్లే వాహనాలకు ప్రత్యామ్నాయ మార్గాలు

స్థానిక ప్రధాన ప్రతినిధి

సంక్రాంతి పండగ సందర్భంగా ఆంధ్రప్రదేశ్ రాష్ట్రం నుంచి పండగ పూర్తి చేసుకుని ఒకేసారి భారీగా వాహనాలు హైదరాబాద్ నగరానికి చేరుకునే అవకాశం ఉన్న నేపథ్యంలో, ట్రాఫిక్ రద్దీ నివారణకు జిల్లా పోలీస్ శాఖ ప్రత్యేక చర్యలు చేపట్టింది.హైదరాబాద్–విజయవాడ నేషనల్ హైవే–65పై చిట్యాల, పెద్దకాపర్తి ప్రాంతాల్లో ఫ్లై ఓవర్ నిర్మాణ పనులు కొనసాగుతున్నందున ట్రాఫిక్ జామ్ అయ్యే అవకాశాలు ఉన్నాయని, ఈ పరిస్థితుల్లో ప్రధాన రహదారులపై రద్దీ ఏర్పడకుండా ప్రయాణికులకు సురక్షితమైన, సాఫీ ప్రయాణం కల్పించడమే లక్ష్యంగా ట్రాఫిక్ దారి మళ్లింపులు అమలు చేస్తున్నట్లు జిల్లా ఎస్పీ శరత్ చంద్ర పవార్ ఐపీఎస్ ఒక ప్రకటనలో తెలిపారు.ఈ క్రమంలో ఆంధ్ర ప్రాంతం నుంచి హైదరాబాద్ వైపు వెళ్లే ప్రయాణికులు క్రింది సూచించిన ప్రత్యామ్నాయ మార్గాలను వినియోగించుకోవాలని పోలీసులు విజ్ఞప్తి చేస్తున్నారు.

దారి మళ్లింపు వివరాలు :

గుంటూరు నుంచి హైదరాబాద్ వెళ్లే వాహనాలు

గుంటూరు → మిర్యాలగూడ → హాలియా → కొండమల్లేపల్లి → చింతపల్లి → మాల్ మీదుగా హైదరాబాద్.

మాచర్ల నుంచి హైదరాబాద్ వెళ్లే వాహనాలు

మాచర్ల → నాగార్జునసాగర్ → పెద్దవూర → కొండమల్లేపల్లి → చింతపల్లి → మాల్ మీదుగా హైదరాబాద్.

నల్లగొండ నుంచి హైదరాబాద్ వెళ్లే వాహనాలు

నల్లగొండ → మార్రిగూడ బైపాస్ → మునుగోడు → నారాయణపూర్ → చౌటుప్పల్ (ఎన్‌హెచ్–65) మీదుగా హైదరాబాద్.విజయవాడ నుంచి హైదరాబాద్ వెళ్లే భారీ వాహనాలు :

కోదాడ → హుజూర్నగర్ → మిర్యాలగూడ → హాలియా → చింతపల్లి → మాల్ మీదుగా హైదరాబాద్.

ఎన్‌హెచ్–65 (విజయవాడ–హైదరాబాద్) రహదారిపై చిట్యాల, పెద్దకాపర్తిలో ట్రాఫిక్ జామ్ ఏర్పడిన పక్షంలో :

చిట్యాల నుంచి భువనగిరి → చౌటుప్పల్ మార్గం ద్వారా హైదరాబాద్ వెళ్లాలని సూచించారు.

సంక్రాంతి రద్దీ సమయంలో ప్రయాణికులు పోలీసుల సూచనలు పాటించి సహకరించాలని, ట్రాఫిక్ నిబంధనలు తప్పనిసరిగా అనుసరించాలని జిల్లా పోలీస్ శాఖ కోరింది.