సీఎం కప్–2025 (సెకండ్ ఎడిషన్)కు సన్నద్ధమైన తెలంగాణ

గ్రామం నుంచి రాష్ట్ర స్థాయి వరకూ క్రీడా సంబరాలు

స్థానికం ప్రధాన ప్రతినిధి

తెలంగాణ రాష్ట్ర ప్రభుత్వం అత్యంత ప్రతిష్టాత్మకంగా నిర్వహిస్తున్న సీఎం కప్–2025 (సెకండ్ ఎడిషన్) క్రీడా టోర్నమెంట్‌కు అన్ని ఏర్పాట్లు పూర్తయ్యాయి. గ్రామీణ యువతలో క్రీడా నైపుణ్యాలను వెలికి తీసి, రాష్ట్ర స్థాయిలో ప్రతిభావంతులను ప్రోత్సహించాలనే లక్ష్యంతో ఈ టోర్నమెంట్‌ను గ్రామపంచాయతీ స్థాయి నుంచి రాష్ట్ర స్థాయి వరకు నిర్వహించనున్నారు.

ఈ టోర్నమెంట్‌లో భాగంగా గ్రామపంచాయతీ స్థాయి క్రీడలు ఈ నెల 17 నుంచి 22 వరకు, అలాగే మండల స్థాయి పోటీలు 28 నుంచి 31 వరకు జరగనున్నాయి. వివిధ క్రీడాంశాల్లో క్రీడాకారులు పోటీ పడేందుకు అవకాశం కల్పించగా, ప్రతిభ చూపిన వారికి తదుపరి స్థాయికి ఎంపిక చేసే విధంగా ప్రభుత్వం ప్రణాళిక రూపొందించింది.

సీఎం కప్ ద్వారా గ్రామీణ ప్రాంతాల్లోని యువతకు పెద్ద వేదిక లభించడంతో పాటు, క్రీడల పట్ల ఆసక్తి మరింత పెరుగుతుందని క్రీడా వర్గాలు భావిస్తున్నాయి. ముఖ్యంగా గ్రామస్థాయిలో క్రీడలను ప్రోత్సహించడం ద్వారా ఆరోగ్యకర సమాజ నిర్మాణానికి ఇది దోహదపడుతుందని అధికారులు పేర్కొన్నారు.

ఈ టోర్నమెంట్‌లో పాల్గొనదలచిన క్రీడాకారులు https://satg.telangana.gov.in/cmcup వెబ్‌సైట్‌లో లేదా అందుబాటులో ఉన్న క్యూఆర్ కోడ్ ద్వారా రిజిస్ట్రేషన్ చేసుకోవచ్చని తెలిపారు.

గ్రామీణ యువత ప్రతిభను రాష్ట్రానికి పరిచయం చేసే వేదికగా సీఎం కప్–2025 నిలవనుందని, క్రీడాకారులు ఈ అవకాశాన్ని సద్వినియోగం చేసుకోవాలని నిర్వాహకులు పిలుపునిచ్చారు.