స్థానికం ప్రధాన ప్రతినిధి కొండ మల్లేశం గౌడ్

గ్రామ సర్పంచ్ కాట వెంకటేశం నేతృత్వంలో నార్కట్‌పల్లిలోని కామినేని ఇన్‌స్టిట్యూట్ ఆఫ్ డెంటల్ సైన్సెస్ ఆధ్వర్యంలో పెద్దకాపర్తి గ్రామంలో భారీ ఉచిత దంత వైద్య శిబిరాన్ని నిర్వహించారు. ఈ శిబిరం గ్రామస్తులకు ఎంతో ఉపయోగకరంగా నిలిచింది.ఈ సందర్భంగా కామినేని డెంటల్ కళాశాలకు చెందిన వైద్యులు, విద్యార్థుల బృందం గ్రామస్తులకు నోటి ఆరోగ్య ప్రాముఖ్యతపై అవగాహన కల్పించారు. రోజూ పళ్ళు తోముకునే సరైన విధానాలు, నోటి పరిశుభ్రత కోసం తీసుకోవాల్సిన జాగ్రత్తలను వివరించారు. ముఖ్యంగా పిల్లలు, వృద్ధుల్లో కనిపించే సాధారణ దంత సమస్యలపై ప్రత్యేక సూచనలు చేశారు.దంత సమస్యలతో బాధపడుతున్న వారిని ఉచితంగా పరీక్షించి, అవసరమైన చికిత్స వివరాలను తెలియజేశారు. తీవ్రమైన చికిత్స అవసరమైన వారికి ఆసుపత్రిలో ఉచితంగా మెరుగైన వైద్యం అందిస్తామని వైద్యులు తెలిపారు. అలాగే చికిత్స నిమిత్తం ఆసుపత్రికి వెళ్లే రోగుల సౌకర్యార్థం ఉచిత బస్సు సౌకర్యాన్ని కూడా ఏర్పాటు చేసినట్లు వెల్లడించారు.ఈ శిబిరంలో సర్పంచ్ కాట వెంకటేశం, ఉప సర్పంచ్ ఓర్సు సైదులు, వార్డు సభ్యులు యాదయ్య, తెలుసూరి నరసింహ, పంచాయతీ కార్యదర్శి గౌతమ్ రెడ్డి, డెంటల్ కళాశాల విద్యార్థులు తదితరులు పాల్గొని కార్యక్రమాన్ని విజయవంతం చేశారు.